Амыдыралчы төлевилелдер тиилээн

Найысылалдыӊ медээлери

Найысылалдыӊ чагырыкчызы Карим Саган-оолга «Хамааты авиацияныӊ 100 чылы» деп медальды «Кызылдыӊ аэропорту» федералдыг казна бүдүрүлгезиниӊ директору Олег Бады тывыскан.
Кызыл аэропортунуң хөгжүлдезинге хоорай чагырыкчызы үлүг-хуузун киирип турар дээрзин ол демдеглээн.

Кызыл хоорайныӊ чагырыкчызыныӊ грантызын тыпсыр мөөрейге12 хөй-ниити организациялары 28 төлевилелди саналдап киирген.
Ниитилелге, чоннуӊ амыдыралынга ёзулуг ажык-дузалыг 12 төлевилелди шилээн. Кызыл хоорай чагырыкчызыныӊ грантызыныӊ сертификаттарын тывыскан.

«Кунфу аянынга танцы-сам» деп төлевилелди Айыжы Иргиттиӊ удуртулгазы-биле Дайынчы уран чүүл сайзырадыр төп амыдыралга боттандырып эгелээр.

«Дүжүп бербе» төлевилелди (удуртукчузу Айлаӊмаа Монгуш) «Бүгү-российжи инвалидтер ниитилелиниӊ» Тыва Республикада организациязы, «Спорт чаныӊарда» төлевилелди (удуртукчузу Айтолина Саая) «ТР-ниӊ инициативалыг эмчилери» регионалдыг хөй-ниити организациязы, «Россия биле Донбасс: чаӊгыс төөгүлүг» төлевилелди (удуртукчузу Радмила Оюн) «КНИОГАНОМ» автономнуг коммерциялыг эвес организация боттандырары-биле тус-тус сертификаттарны алган.

Алкоголь болгаш наркотик ажыглаарынга чаӊчыга берген улуска дузалаар «Дамырак» төвүнүӊ «Феникс» деп төлевилелин (удуртукчузу Органа Натсак), «Логос» немелде өөредилге төвүнүӊ «Азбука счастливой семьи» төлевилелин (удуртукчузу Анна Сванес) үнелеп, улаштыр ажылдаарынга деткимчени берип, сертификаттарны тывыскан.

Регионнар аразында болгаш республиканыӊ иштинде чоннуӊ көжүп турарыныӊ чылдагаанын тып, социал шинчилелдер чорудар төлевилелди (удуртукчузу Органа Натсак) саналдаан Тываныӊ гуманитарлыг болгаш социал-экономиктиг тускай шинчилелдер институду база мөөрейге тиилээн.

«Алдын скиф» коммерциялыг эвес культура төвү «Образ внутри. Инициация» төлевилелди ТР-ниӊ уран чүүлүнүӊ алдарлыг ажылдакчызы Чурук Шойнуӊ удуртулгазы-биле боттандырар.

«Тываныӊ буянныг чүректери» деп аныяктар организациязы Кызыл хоорайда ажылдавайн, өөренмейн турар аныяктар аразынга I-ги өөредилге форумун эрттирер төлевилелди (удуртукчузу Артыш Монгуш) киирген.

«Тыва Республикада КВН шимчээшкини» республиканыӊ аныяктар организациязы «Дорога в «Детский КВН» деп төлевилелди Сылдыс Калындуунуӊ удуртулгазы-биле боттандырар.

«Кочевники Азии» деп регионалдыг хөй-ниити организациязы мотоклубту (байкпост) дериир төлевилелди Илья Ивановтуӊ удуртулгазы-биле кылыр болган.

Тыва Республикада холушкак дайынчы спорт (ММА) федерациязы кижидилгези берге элээдилерниӊ болгаш өскүс уругларныӊ келир үезин бодап, «Шын шилилге» төлевилелди – Денис Шалавинниӊ удуртулгазы-биле амыдыралга боттандырар.

Найысылалдыӊ чагыргазы улуг-биче кижилерниӊ амыдыралынга ажыктыг төлевилелдерни боттандырар организацияларныӊ улаштыр ажылдаарынга деткимчени берген.

Хоорай чагыргазы чон-биле сырый харылзаалыг ажылын уламчылап турар. Кызыл хоорайныӊ Төлээлекчилер хуралыныӊ депутаттарыныӊ хүлээп алыышкыны март 6-10 хүннеринде болур.

Кызыл хоорай чагыргазыныӊ медээлери-биле Р. Демчик белеткээн.