Чаа чыл бүдүүзүнде Россия Федерациязының Президентизиниң Сибирь Федералдыг округта бүрүн эргелиг төлээзи Анатолий Серышев «Күзелдер шивизи» деп бүгү-российжи ачы-буян акциязынга каттышкан.
«Чаа чыл – хуулгаазынныг сорук сиңген буянныг болгаш чырык байырлал-дыр. Ынчангаш кижилерниң күзелдери, ылаңгыя эң-не алыс күзелдери бүдер ужурлуг» – деп, А. Серышев демдеглээн.
Анатолий Серышев шивиден үш шарны адырып алган: Луганск Улус Республиканың Новодеркул суурдан 16 харлыг Дарья күзээн гитаразын, Иркутск областың Усолье-Сибирское хоорайдан 13 харлыг Даниил каркастыг бассейнни, а Омск облазындан сес харлыг Дарья ойнаар-кыстар коллекциязын белекке алырлар.
Ол ышкаш бүрүн эргелиг төлээ Сибирь регионнарындан 10 уругнуң күзелдерин база бүдүрер. Оларның аразында эң-не бичиилери – Омск хоорайдан 3 харлыг Амина ойнаар-кыстар бажыңчыгажын, Минусинскиден 6 харлыг Костя дельфинарий барып көөрүн, а Тыва Республикадан 6 харлыг Хая Соок-Ирейден тывызык солун белек манап турар.
Ол ышкаш Иркутск хоорайдан 14 харлыг Елизаветаның аэрохоолайга, а Новосибирск хоорайдан 10 харлыг Максимниң ёзулуг шын вертолётка ужудар күзелдери база бүдер. Томск хоорайдан 6 харлыг Егор болгаш Барнаулдан 11 харлыг Никитаның күзелдери ажыл-агый-биле харылзаалыг: Егор полиция ажылдакчызы-биле мендилежип холун туткаш, патруль автомашиназынга олуруксаар, а Никита поездиниң машинизиниң кабиназынче кириксеп турар.
Алтай Республиканың төвү Даг-Алтай хоорайдан Ойгор хөгжүмге улуг сонуургалдыг, ынчангаш белек кылдыр синтезатор чагаан. Хакас Республиканың Аскиз районунуң Бирикчуль деп суурундан 13 харлыг Анастасия чуруттунарынга болгаш номчуттунарынга, ылаңгыя Алексей Толстойнуң номнарынга дыка ынак – ол ынак чогаалчызының чыынды номнарын алыр.
«Күзелдер шивизи» акция Владимир Путинниң бот-идепкейи-биле 2018 чылдан тура эгелээн. Ол үе дургузунда 100 муң ажыг уругларның алыс күзелдери бүткен. Акцига 3 хардан 17 хар чедир кадыының байдалы кызыгаарлыг, ол ышкаш өскүс болгаш амыдыралы чегей өг-бүлелерниң ажы-төлү киржип турар. Ылаңгыя тускай шериг операциязының киржикчилериниң ажы-төлүнче база ЛУР-да, ДУР-да, Запорожье болгаш Херсон областарда чурттап турар уругларже онзагай кичээнгейни салып турар.
Сибирь округтуң информастыг төвүнүң медээзинден.