«МЕН – БАШКЫ МЕН» ДЕП МӨӨРЕЙГЕ КИРЖИР КҮЗЕЛДИГЛЕРНИ ТЫВА РЕСПУБЛИКАНЫҢ ӨӨРЕДИЛГЕ ЯАМЫЗЫ ЧАЛАП ТУРАР.
«Мен – башкы мен» деп программаны боттандырары-биле 2023 чылдың дээди өөредилге черлериниң доозукчуларын деткиир сорулгалыг чаңгыс удаа төлевир акшаны алырынга шилилге мөөрейни чарлаан.
Мөөрейге кым киржип болур?
2023 чылда дээди өөредилге черин дооскаш, башкы эртеминиң аайы-биле школада ажылдай бергени.
Мөөрейниң негелделери:
РФ-тиң девискээринде дээди өөредилге чериниң 2023 чылда доозукчузу.
Квалификастыг негелделерге дүүшкен дээди эртеми. Документ дужаар хүнде назыны 35 хар.
Өөредилге албан черинде ажылдай бергени. Неделяда 18-тен эвээш эвес кичээлдерлиг болуру.
Үштен эвээш эвес чыл дургузунда ажылдаар күш-ажыл керээзин чарып алганы.
Херек документилер:
- Паспорттуң 1, 2 дугаар арыннарының хоолгазы;
- Нотариуска шынзыткан дээди өөредилге черин дооскан дугайында дипломнуң хоолгазы;
- Бир эвес бар болза, квалификация эрткен дугайында шынзылга бижик (чок болза ажырбас).
- Нотариуска азы ажылдаар чериниң кадрлар харыылаар специализиниң шынзытканы күш-ажыл дептериниң хоолгазы.
- ИНН биле СНИЛС-тиң хоолгалары;
- Акша-төгерик шилчидер хууда агар саны;
- Өг-бүлелиг болза, бадылга бижиктиң, а ажы-төлдүг болза уругларының төрүттүнген дугайында херечилелиниң хоолгалары;
- Документилер сугар тускай папка.
Компенсация акшазы алыр хамаатылар тускай комиссия эртер. Чүгле тиилекчилер ук компенсацияны алыр эргелиг болур.
Мөөрейге киржир күзелдиглерниң документилерин Кызыл хоорайның Чүргүй- оол кудумчузунуң 1 дугаар бажыңында, 201 дугаар кабинетте, август 10-дан сентябрь 1-ге чедир хүлээр. Билдинмес айтырыгларны 8 (39422)2-84-50 дугаарже долгааш, билип алыр.
Бистиң корр.
"Шын" №60, 2023 чылдың август 12