Россияда Национал донорлар хүнүн чылдың-на апрель 20-де демдеглеп эрттирип турар. Ол хүннү көңгүс танывазы улустуң кадыкшылы болгаш чуртталгазы дээш бодунуң ханын харам чокка берип чоруур кижилерге хүндүткел кылдыр тургускан. Ол ышкаш ханны ап, хан солуй кудар станцияның арыг-силиин хыналдага ап, хан солуй кудар методиканы болгаш аппаратураны ажылдап кылып, дужааган ханны экидир хынап турар эмчилерниң болгаш эмнелге ажылдакчыларының хүнү база болур.
“Тывада чылдың-на муң-муң кижилерге хан солуй кудары хереглеттинип турар. Онкологиядан аар аараан кижилерге, чаа чиигээн херээжен улуска, орук озал-ондаанга таварышканнарга, кадыкшылга айыыл чедирип болгу дег янзы-бүрү мергежилдиг кижилерге ханның боду болгаш ооң компонентилери кончуг чугула. Ынчангаш донорлар оларның чуртталгазынга ылап-ла идегелди берип турарлар. Донор кижиниң чаңгыс катап дужааган ханы 3 кижиниң чуртталгазын камгалап болур” – деп, республиканың хан солуй кудар станциязының ажылдакчылары демдеглээн.
Хан солуй кудар станцияның ажылдакчылары бүгү-ле күзелдиг кижилерни мобильдиг станцияның баазазынга хан дужаар акцияга киржиринче чалап турар. Апрель 17-де Кызыл хоорайның эмнелге хоорайжыгажының девискээринге мобильдиг станция хан хүлээп ажылдаар.
Кадык, хан дужаарынга хоруглар чок, деңзизи 50 килден өрү, 18 хардан тура кандыг-даа кижи донор болур аргалыг.
ТР-ниң Хөй-ниитиниң кадыкшылга төвүнүң медээлеринден Ч. СААЯ белеткээн.
“Шын” №29 2024 чылдың апрель 17
