| “Россияда ажыл” Бүгү-российжи ажыл ярмарказы |
Даарта, июнь 26-да, “Россияда ажыл” Бүгү-российжи ажыл ярмарказынга Тыва Республика каттыжар. Сөөлгү чылдарда ажыл ярмарказы хамаатыларның ажыл тып ап болурунуң база бир аргазы апарган. Ук ярмарка республикада бо чылын дөрт дугаар эртери ол. Ооң мурнунда эрткен ярмаркаларга 309 ажыл берикчизи, 7,8 муң кижи киришкен. Ажыл берикчилери хамаатыларга 900 ажыг ажылчын олуттарны сүмелээн, 628 кижи ажылды шилип алганнар.
Бо чылгы ярмаркага 30 ажыг бүдүрүлге киржир. Олар 1000 хире ажылчын туруштарны ажылдаар күзелдиг кижилерге сүмелээрлер. Бир эвес хамааты сеткилинге тааржыр ажылды ярмаркага саналдаан ажылчын олуттар аразындан шилип албас-даа болза, бодунга тааржыр ажылды тып алырынга хамаарыштыр арга-сүмелерни Кадрлар төвүнүң специалистеринден ап болур. Олар ярмаркага келген кижи-биле чугаалажып, хамаатының бодунуң сонуургалы, эртем-билииниң аайы-биле арга-мергежилин сайзырадырының, харын-даа мырыңай өскертириниң талазы-биле сүмелерни бээрлер. Ярмарканың киржикчилериниң эртем-билииниң, мергежилиниң аайы-биле улам сайзыраарының, билиглериниң кыдыг-кызыгаарын улам алгыдар талазы-биле мастер-класстарны база олар эрттирерлер.
Ажыл ярмарказынга улуг кичээнгейни чүгле ажыл шилип алыр дээш келгеннерже эвес, а школачылар болгаш студентилерже угландырар. “Мергежилдер фестивалы” деп интерактивтиг профессионал девискээрге келир үеде, ырак-ла дизе, чоокку 5-10 чылдарда ажыл рыногунга кончуг херектиг апарып болур мергежилдер дугайында билип ап, келир үеде өөредилгеге, мергежил шилип алырынга ажыктыг апаар хире сүмелерни дыңнаарлар.
Ажыл ярмарказынга онза кичээнгейни тускай шериг операциязының киржикчилери – Ада-чурт камгалакчыларынче салыр. Оларга тускайлаан аңгы шөлге ТШО-нуң киржикчилеринге, өг-бүлелериниң кежигүннеринге ажылга тургустунуп алырынга күрүнеден деткимче, эртем-билиин болгаш ажылчын мергежилин бедидер, харын-даа мырыңай өске мергежилге өөренири дээш өске-даа хемчеглерни кижи бүрүзүнге хууда Кадрлар төвүнүң ажылдакчылары тайылбырлап бээр.
РФ-тиң Социал фондузунуң, Хөй угланыышкынныг төптүң (МФЦ), Тыва Республиканың суд приставтары албан чериниң специалистери “чаңгыс соңга” чурумунга хамаатыларны хүлээп, айтырыглыг келген хамааты бүрүзүнге тайылбырны бээр, арга-сүмени кадар.
Ажыл ярмарказы Кызылга үш шөлге эртер: Кадрлар төвүнүң шөлү, күрүне деткимчезиниң хемчеглериниң шөлү, өөредилге шөлү. Кадрлар шөлүнге ажыл дилээр талазы-биле ачы-дузаны долузу-биле көргүзер. Ол дээрге Кадрлар төвүнүң ажылдакчылары резюме тургузарынга, ярмарка үезинде саналдаан ажылдарның аразындан ажылды шилип алырынга дузалажыры, ол ышкаш профессионал өөредилге азы өске мергежилге өөренириниң программаларынга хамаарыштыр тайылбырны бээри. Регионда улуг компанияларның саналдап турар ажылдарынга хамаарыштыр оларның ажылдакчылары-биле дорт чугаалажып, азы онлайн-шилилге аргаларын ажыглап болур. Оон ыңай социал керээни чарып алырының чурумунуң дугайында тодаргайы-биле бо шөлге билип алыр арга бар.
Кызылга июнь 26-да эртер “Россияда ажыл” Бүгү-российжи ажыл ярмарказының программазында база бир кол чүүл – күрүне деткимчезиниң хемчеглериниң шөлү. Ооң бир чугула кезии – ажыл дилеп азы сонуургап келгеннерге консультация дузазын көргүзери. “Чаңгыс соңга” чурумунга социал дузага хамааржыр айтырыгларга харыыларны РФ-тиң Социал фондузунуң Тывада эргелелиниң, хөй угланыышкынныг ажыл-чорудулгалыг төптүң, Суд приставтарының федералдыг албанының республикада эргелелиниң ажылдакчылары тодаргайы-биле бээр. Бо шөлге улуг кичээнгейни тускай шериг операциязының киржикчилеринче, оларның өг-бүлелеринче угландырар. ТШО-нуң киржикчилеринге, оларның өг-бүлелеринге күрүнеден деткимче айтырыгларынга хамаарышкан эргежок чугула тайылбырны бээр, ТШО-нуң киржикчизинге азы ооң өг-бүлезинге хууда деңнелге дузалажырының хемчеглерин алыр.
Өөредилге шөлү база июнь 26-да Кызылга эртер ажыл ярмарказынга ажыттынар. Ол шөлге амгы үеде чугула хереглелдиг, келир үеде кончуг херек апаар мергежилдер-биле өөреникчилерни, оларның ада-иелерин болгаш студентилерни виртуалдыг хевирге таныштырар. Кандыг-даа мергежилге, ажылга херек апарып болур психологтуг байдалдарны сайзырадыр талазы-биле тренингини интерактивтиг VR-арена чорудар.
“Россияда ажыл” Бүгү-российжи ажыл ярмарказының талазы-биле хемчеглер Тыва Республиканың кожууннарынга болгаш сумуларынга болуп эртер.
/ Ш. Моңгуш.
Чуруктарны "ТМГ"-ден алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...