Кызылдыӊ чамдык хөй квартиралыг бажыӊнарыныӊ чурттакчылары суг аксыр крандан көңгүс эвээш суг агып кээр дээш эрге-чагырга органнарынга өйлеп-өйлеп билдириишкин бижип турарлар. Ындыг чүүлдер аӊгы-аӊгы байдалдардан болу бээр. Иркутская биле Магистральная кудумчуларында чаа чуртталга комплекизин тудуп турар болгаш, суг агымыныӊ күжү чедишпейн турар дээрзин специалистер тайылбырлаан.
Тываныӊ Баштыӊы Владислав Ховалыг ооӊ-биле холбаштыр суг сордурар чаа насос станциязын тударыныӊ дугайында шиитпирни хүлээп алган. Чаа насосту кылыптарга, суг дамчыдылгазы экижиир, Кызыл хоорайга амгы үениӊ чаагайжыттынган чуртталга комплекизин улаштыр тударынга таарымчалыг болур. Иркутская микрорайоннуӊ чеди муӊ ажыг чурттакчызын ижер суг-биле хандырар чаа суг сордурар станцияны хүлээникчи организация «Бастион» КХН кылып турар.
«Бо хүннүү-биле алыр болза, хоорайныӊ суг дамчыдар төп хоорзаларындан сугну сордурар күштүг насос станциязыныӊ таваан, фундаментизин кылып турар. Трансформаторлуг подстанцияныӊ фундаментизиниӊ адаанга турар өзектерин эптеп быжыглап турар» — деп, Тываныӊ тудуг сайыды Аяс Хунай-оол чугаалаан.
300 дөрбелчин метр шөлдүг чаа станцияны «Бастион» ниитилели ук төлевилел ёзугаар кылып турар.
«Тудуг объектизиниӊ девискээриниӊ кызыгаарын шыйгаш, херимнээн. Суг сордурар насостуӊ адаанга турар таваан, фундаментизин элезин-довуракты хоюдуп тургаш кылып каан. Чырык сайгылгааннар кылыр бетон чагыларны тургускан. Бо чылдыӊ ноябрь айда объектини дужаарын планнап турар бис» — деп, хүлээникчи организацияныӊ төлээзи чугаалаан.
Хүлээникчи организация «НИК» КХН Преображенский микрорайонда суг дамчыдар четкиниӊ хоорзаларын кылып турар. Ону база Иркусткая микрорайоннуӊ чаа станциязынга кожар. Төпчүткен суг хандырылгазынга ону кожуп кылыпкан соонда, ук микрорайоннуӊ алды муӊ хире чурттакчызын ижер суг-биле хандырар дээрзи ук объектиниӊ планында көрдүнген. Амгы үеде суг дамчыдар хоорзаларныӊ турар таваан белеткеп, оӊгарларын казып белеткээр ажылдарны кылып турар. Бо объектини план ёзугаар 2024 чылдыӊ ноябрь 30-де ажыглалга киирер.
«Арыг суг» федералдыг төлевилел чурттакчы чонну шынарлыг суг-биле хандырар ажылдарны шиитпирлээринче угланган. Үстүнде айыткан объектилер, Ак-Довурак хоорай биле Чеди-Хөл кожуунга суг хандырылгазыныӊ ийи төлевилелин ук федералдыг төлевилелдиӊ шугуму-биле боттандырып кылыр дээрзин Тываныӊ тудуг сайыды Аяс Хунай-оол дыӊнаткан.
/ Р. ДЕМЧИК белеткээн.
"Шын" №38 2023 чылдың май 27
