Тыва Республикада 2024 чылдың эгезинден тура энтеровирус аарыындан аараан 63 таварылга бүрүткеттинген. Ол дээрге 100 муң чурттакчы чонга хамаарыштыр 18,6 хуу. Оларның 61-и бичии уруглар болган. Энтеровирус халдавырлыг аарыгның эң-не берге хевири энтеровирус менингиди болур. Бо чылын республикада 1 таварылга демдеглеттинген.
Халдавырның тараар объектилеринге аарыгның чедир арыглаттынмаан дөзү, уруглар ойнаар төптерниң өрээлдери, бассейннер, аквапарктар дээш оон-даа өске хөй-ниити черлери хамааржыр.
Аарыгны болдурбас азы ооң тараарын эвээжедир деп бодаар болза, аарыгның нептереп болгу дег черлеринге немелде профилактиктиг хемчеглерни чорударын сүмелеп турар. Дезинфекция кылыр херекселдер-биле арыглаашкынны көвүдедир, уруглар ойнаар шөлдерни, ойнаарактарны, эт-херекселдер кырын аштап-чуур.
Чаштар ойнаар өрээлдерни, ойнаарактарны, уругларның эт-херекселдерин аштап-арыглаарда, ойнаарактар чуур тускай холуксаалар ажыглаары чугула.
Садыг-саарылга, хөй-ниитиниң чемненилге, бүдүрүлге черлериниң удуртукчуларынга Тыва Республиканың Росхереглелхайгаарал эргелели дараазында чүүлдерни сагындырып турар:
Ук аарыгның суг, аъш-чем, эт-херексел таварыштыр тараарын, долгандыр хүрээлелге энтеровирустуң үр үеде читпезин өөренип көргеш, профилактиктиг бөлүк хемчеглерни күштелдирерин организастаары эргежок чугула дээрзин сагындырган:
Ажылдакчыларга болгаш келген кижилерге арыг-силигниң дүрүмнерин сагыырынга эптиг байдалды тургузар. Саваң, аржыыл, чунар-демир, арыгланыр саазын болгаш өске-даа херекселдер турары чугула. Ажыл шагының эгезинде ажылдакчы бүрүзүнүң кадыының байдалын айтырар, журналга демдеглээр.
Садыг-саарылга болгаш хөй-ниитиниң чемненилге черлеринге дезинфекция херекселдериниң курлавыры турар ужурлуг. Хүн бүрүде ажыл шагының соонда шык пөс-биле арыглаашкынны кылыр. Ооң соонда оран-савага, дериг-херекселдерге, аяк-савага болгаш оон-даа өске чүүлдерге дезинфекцияны албан чорудар. Эжик тудаларын, раковиналарны, кранның ажыдар, хаар тудаларын дезинфекциялыг холуксаа-биле өттүрген пөс-биле ажыл шагының үезинде 2-ден эвээш эвес аштап-чодар.
Албан черлериниң арыгланыр өрээлдери үргүлчү арыг болзун дээш, дезинфекция херекселдери-биле шалазын, ханаларын, эжииниң тудаларын аштаар ужурлуг.
Бүдүрүлге черлеринге бүдүн хонук дургузунда шык пөс-биле 2 катап арыглаашкынны кылыр. Ол үениң аразы дең болур ужурлуг. Ооң соонда дезинфекцияны база албан чорудар.
Арыглаашкын чорударда, аяк-сава чуурда, садыг-саарылга болгаш хөй-ниити черлеринге ажыглаар тускай холуксаалар ажыглаары чугула. Тайылбыр бижээн саазынында “хөй-ниитиниң чемненилге, садыг-саарылга черлеринге ажыглаар” деп бижип каан болур.
Тыва Республиканың Росхереглелхайгаарал эргелелиниң медээлеринден Чыжыргана СААЯ белеткээн.
“Шын” №51 2024 чылдың июль 10