Оренбург хоорайга март 6–8 хүннеринде Оренбург облазынга спортчу хүрештерниң үндезилекчизи Юрий Черновка тураскааткан Россияның 1 дугаар Кубогу дээш хостуг база грек-рим хүреш маргылдаазы болган. Россия, Белоруссия, Казахстан, Мурнуу Осетиядан 200 ажыг хоочун мөгелер 36-дан 70 хар чедир 7 бөлүкке солун хүрешти көргүскеннер. Бистиң республикадан 8 хоочун мөге киришкеш, команда талазы-биле 3 дугаар черге төлептиг болганнар.
Бо улуг маргылдаага Россияның хоочуннар аразынга 4 хевирниң (хостуг, грек-рим, самбо, дайынчы самбо) тиилекчизи 69 харлыг Анатолий Кара-Сал, эң улуг 66–70 хар чедир бөлүкке, холга олуй-солуй тудар аргалары-биле хамыкты кайгадып, грек-рим хүрештерге бирги черни ап, эштериниң хей-аъдын көдүрген.
Хостуг хүрешке алдын медальдарны Аяс Ондар (88 килге) биле Владимир Көшкендей (62 килге) алган. Ийи дугаар черлерге Омак Кара-Сал (88 килге), Николай Ондар (62 килге) база делегей чергелиг спорт мастери Радислав Наважап тергиидээн. Айдыс Куулар биле Чингис Докан-оол (88 килге) 3 дугаар черге төлептиг болганнар.
Грек-рим хүрешке алдын медальдарны Омак Кара-Сал биле Николай Ондар алганнар. Ийи дугаар черге Владимир Көшкендей, үшкүзүнге Аяс Ондар, Айдыс Куулар база Чингис Докан-оол тергиидээннер.
Хоочуннар хостуг база грек-рим хүрештерге республиканың ажык чемпионадын апрель төнчүзүнде эрттирерин саналдааннар. А Россия чемпионады май төнчүзүнде Смоленск хоорайга болур. Путевка алган мөгелер Россияның чыынды командазы-биле октябрь ортузундан бээр Хорватияга делегей чемпионадынга киржирлер.
Алексей ЧАМБАЛ-ООЛ белеткээн.
“Шын” № 23 2024 чылдың март 27
