ТАР-ның ССРЭ-ниң составынга эки тура-биле каттышканының 80 чылы
Чөөн-Хемчик кожууннуң Бора-Хөл ховузунга чылдың-на апрель айда эрттирип турар чүгүрүк аъттар чарыжының республика чергелиг XXXI-ги маргылдаазын ТАР-ның ССРЭ-ниң составынга каттышканының 80 чылынга тураскааткан.
Дүүн, апрель 27-де, эрткен маргылдааны Кызыл биле Тере-Хөл кожууннар организастап эрттирген. Аъттарны назы-хар аайы-биле бөлүктерге аңгылап, чарышка киириштирген. Бөлүк бүрүзүнге чарышка мурнады келген дөрт аъттарның ээлеринге 70-250 муң рубль акша шаңналдарын тывыскан. Бирги черни ээлеп, эртип келген аъттарның ээлерин “Нива” марканың автомашиналары-биле шаңнаан. Сүт-Хөлден Эрес Кара-Сал, Улуг-Хемниң Иштии-Хемден Сыдым-оол Оюн, Кызыл кожуундан Радомир Иргит дээш беш аңгы аъттарның ээлери чаа машиналарның ээлери болган.
Аът чарыжының үезинде тыва ча адарынга кара адар маргылдааны база эрттирген. Ча адар маргылдаага бирги черни Бай-Тайгадан Айдың Хомушку, ийиги черни Чөөн-Хемчиктен Арсен Моңгуш,үшкү черни Улуг-Хемден Орлан Чанчып олар чаалап алганнар.
Чүгүрүк аъттар чарыжының республика чергелиг XXXI-ги маргылдаазы спорт биле уран чүүлдү каттыштырган улуг байырлал болган. Кызыл биле Тере-Хөл кожууннарның культура ажылдакчылары, төлээлери, ыраажылары чыылган чонга аян туткан.
Ш. МОҢГУШ.
Буян ООРЖАКТЫҢ тырттырган чуруктары.
