Март 8-тиң бүдүүзүнде херээженнер аразынга чылдың-на эртип турар «Авто-Леди 2024» маргылдаага 37 херээжен киришкен. Ооң киржикчилери орук шимчээшкининиң дүрүмнерин билиринге, машинаның дүрген башкарылгазынга, озал-ондак болганда, аңаа когарааннарга бирги эмчи дузазын чедиреринге күжүн шенешкеннер. Шупту төлептии-биле киришкен, ынчалза-даа маргылдаа дээрге маргылдаа-ла болгай!
Маргылдааның түңнелинде, 1-ги черни Саглаш Күжүгет, 2-зин Аяна Ооржак, 3-кү черни Айчек Доңгак алганнар. Тиилекчилерге “ДНС” садыының 8 муң, 6 муң, 4 муң рубль түңнүг сертификаттарын тывыскан.
Бүгү кыстар тергиин эки киришкенинден тиилекчилерни тодарадыры ындыг амыр эвес болган. Ынчангаш чамдык номинацияларны немээр ужурга таварышкан. «Дүргедээшкинниг божуу-далаш башкарылга” деп номинацияга Наргиза Монгуш төлептиг болган. Ол даалгаларны чаңгыс-даа частырыг чокка кыска үеде (1 мин 44 сек) күүсеткеш, тиилекчи болган. Наргиза Монгуш бо мөөрейге дөрт чыл улаштыр киржип турар.
Орук шимчээшкининиң дүрүмнерин тулган эки билири дээш Онзалай Успуң тергиидээн. Март 8-те төрүттүнген автоледи Алдынай Саая база тускай шаңналга төлептиг болган.
Мөөрейниң организакчылары деткикчилерге — Тыва Республиканың Херээженнер эвилелинге, Тываның күрүне университединге, «Dolma» деп продюсер төвүнге, Best_Version27 деп чараштанылга төвүнге, Таңды кожуундан Юлия Подгорнаяга өөрүп четтиргенин илередип турар.
Бо чылгы мөөрейге немелде — “бажыңга онаалга” база берген. Ол дээрге орукка озал-ондак болганда, когарааннарга бирги эмчи дузазын чедирерин көргүзери-дир. Аңаа республиканың дүрген эмчи дуза төвүнүң төлээлери Тану Ондар биле Аянмаа Ооржак болгаш өскелер-даа күжүн шенешкеннер. Тускай дүрзүге олар тыныжы турупкан, янзы-бүрү бертиниишкиннер алган, ханы төгүлген кижилерге эмчилер кел чыдырда, баштайгы дузаны канчаар чедирерин көргүзүп, чедингир, тода тайылбырларны кылганнар. ОШАЧКИ ажылдакчылары Чейнеш Оюн биле Айыраң Бузур-оолду “бажыңга онаалганы” тергиин эки күүсеткен деп санааннар.
Мөөрейге киришкен 37 автоледи чүгле ава, кады чурттаан эжиниң чөленгиижи эжи эвес, а орук-транспорт озал-ондаанга уругларның бертинер чоруунуң профилактиказынга үлүүн киирип чоруур буянныг иелер база. Ол дээрге кыдыг-кызыгаар чок буян-дыр!
ТР-ниң Орук-транспорт яамызының медээзинден
А. ХЕРТЕК белеткээн.
“Шын” №19 2024 чылдың март 13
