Россия Федерациязының хоорайларынга хамаатыларның карманнарындан оорлаар кем-херек үүлгедиглериниң кол кезии хөй-ниитиниң транспортунга болуп турар. Ынчангаш иштики херектер органнарының ажылдакчылары хөй пассажирлерлиг автобустарга, троллейбустарга болгаш метрога оор чоруктарны болдурбас болгаш кижилерниң айыыл чок чоруун магадылаар дээш, шыңгыы хемчеглерни ап чорудуп турар.
Россия Федерациязының Чазааның 2020 чылдың октябрь 8-те үндүргени № 1640 доктаалы ёзугаар пассажирлер аргыштырылгазының хөй-ниити транспортунуң иштинге, оларның чолаачыларының кабиналарынга видеохайгаарал дериг-херекселин албан тургузарын пассажирлер аргыштырылгазын чорудуп турар организацияларга, сайгарлыкчыларга хүлээндирген. Бо доктаалда айыттынган хемчег пассажирлер аргыштырылгазын боттандырып чорударынга чөпшээрелдиң база бир кол негелдези.
Тываның төвү Кызыл хоорайда база хамаатыларның карманнарындан оорлаар чоруктуң хөй кезии автобустарга болуп турарын ТР-ниң иштики херектер органнарының сайгарылгазы көргүскен. Ынчангаш полиция ажылдакчылары автобустарга корум-чурумну болдурбас талазы-биле баш бурунгаар хемчеглерже улуг кичээнгейни салып турар. Ындыг хемчеглерниң бирээзи Россия Федерациязының Чазааның 2020 чылдың октябрь 8-те үндүргени № 1640 доктаалы ёзугаар пассажирлер аргыштырылгазының хөй-ниити транспортунуң иштинге, оларның чолаачыларының кабиналарынга видеохайгааралдың дериг-херекселин организациялар болгаш сайгарлыкчылар тургусканын хынаары. Кызыл хоорайда пассажирлер аргыштырып турар автобустарның ээлериниң чамдыызы Россия Федерациязының Чазааның 2020 чылдың октябрь 8-те үндүргени № 1640 доктаалын күүсетпээни азы автобустар иштинге видеохайгаарал дериг-херекселин тургуспааны азы тургускан дериг-херексел үрелик болганы полицияның хыналдаларының үезинде илерээн.
Пассажирлерниң айыыл чок чоруун хандырарынга чугула видеохайгаарал дериг-херекселин тургуспааны азы ону чогуур техниктиг байдалга ажыглавааны дээш, хөй-ниити транспортунуң ээлери 200 муңдан 500 муң рубль акшага торгадып болур.
ТР-ниң ИХЯ-ның медээзинден Ш. МОНГУШ белеткээн.
Чурукту интернеттен алган.
«Шын» №6 2024 чылдың январь 27