Уругларның чайгы дыштанылгазынга чедир каш-ла хонуктар арткан. Дыштанылгалар үезинде ажы-төлдүң хостуг үе-шагы көвүдээр. Ынчангаш ТР-ниң Өөредилге болгаш эртем яамызы назы четпээн уругларга «комендант шагын» сагыырын сагындырып турар.
Кежээ 22.00 шактан эртенгиниң 6.00 шакка чедир назы четпээн элээдилер кудумчуга, хөй-ниити черлеринге ада-иези чокка, чааскаан чоруп болбас ужурлуг деп «Бичии уругларның кижизидилгезинге болгаш өзүп сайзыраарынга багай салдар чедирбезиниң» дугайында ТР-ниң 13.07.2019 чылда үндүрген 1489-3 дугаарлыг хоойлузунга үндезилээш, «комендант шагын» тургускан.
Неделя санында Иштики херектер яамызының ажылдакчылары назы четпээн уруглар-биле озал-ондак болдурбазы-биле хөй-ниити черлеринче үнүүшкүннерни чорудуп турар. Дүнеки үеде ада-иезиниң үделгези чок назы четпээн уругларны хөй-ниити черлеринден тудуп эккеп турар таварылгалар бар. Полицияның дежурный кезээнче кирген назы четпээн уругнуң дугайында медээлер Россияның ИХЯ-ның медээлер баазазынче киргеш, аңаа шыгжаттынар. Ол чүүл уругнуң келир үеде өөредилге албан черинче дужаап киреринге багай салдар болур дээрзин билип алза эки.
Школачы дыштанылгалар үезинде ажы-төлге айыыл чок чорукту тургузары, оларны камгалап хайгаараары — ада-иелерниң улуг харыысалгазы. Ынчангаш, хүндүлүг ада-иелер, ажы-төлүңерни улуг кичээнгейге ап, хайгааралыңарны кошкатпаңар!
А. СОЯН белеткээн.
Чурукту ГигаЧатка чураан.
“Шын” №19 2026 чылдың май 21
"Шын" солуннуң МАХ-каналынга каттыжыңар max.ru/join/egenQ...