Чаа чылдың дыштаныр хүннеринде Тес-Хем кожууннуң культура ажылдакчылары школачыларга хөглүг болгаш ажыктыг дыштанылганы организастап турар. Кожууннуң культура бажыңнарында Түр үениң дыштанылга төптерин кышкы дыштанылгалар үезинде ажыткан. Ында төптерниң организакчылары уругларга янзы-бүрү хемчеглерни сонуурганчыг болгаш уттундурбас кылдыр эрттирип турар.
Чижээлээрге, уругларга кинофильмнер көрүлделери хүннүң болуп турар. Ол ышкаш уруглар боттарының сонуургалдарының аайы-биле янзы-бүрү бөлгүмнерде кичээлдеп турар. Ында аргыыр-даараарындан эгелээш, уран чүүл талазы-биле чогаадыкчы хемчеглерде киржип турар.
Чуңгу чокка кышкы дыштанылга хөглүг эртпес болгай. Ынчангаш даштыгаар үнүп агаарлаары база бир хүн чуруму. Арыг агаарга шимченгир оюннар уругларны чүгле ойнадып хөгледир эвес, кадыын база быжыктырар.
Хөглүг, шимченгир оюннар болгаш сонуурганчыг кичээлдер соонда уругларны торт болгаш пиццалыг шайлаашкын манап турар. Эш-өөрү-биле чоок харылзаа тудуп, бот-боттарын эки билчип алыр эң-не эки үе ол.
Мындыг хемчеглер уругларның сайзыраарынга ажыктыг, сеткил-сагыжы-биле өөрүп, чаа эш-өөр-биле таныжып алырынга дузалаар. Ол ышкаш кышкы дыштанылгазы уттундурбас хөглүг болгаш ажыктыг эртер.
Тес-Хем кожуун чагыргазының медээлеринден.
