Тываның Баштыңы Владислав Ховалыг долу эвес мөөңнээшкин-биле тускай шериг операциязынче Тывадан чорутканнарның видеобижидилге дамчыштыр киирген дилээнге хамаарыштыр ажылдың чоруттунуп турарын дыңнаткан.
"РФ-тиң камгалал сайыдының оралакчызы генерал-полковник Виктор Петрович Горемыкин-биле доктаамал харылзаада тур мен. Ол амгы үеде тускай шериг операциязы чоруттунуп турар черниң шуут чоогунда чоруп турар. Бистиң шериг албанныгларывыстан база оларның чоок улузундан кээп турар чидиг айтырыгларның дугайында аңаа дыңнаттым. Сайгарып, шиитпирлээрин аазады - деп, Владислав Ховалыг бодунуң социал четкилерде арыннарынга бижээн. - Бо хүн база катап ДУР-нуң Чазааның Даргазы В.П. Хоценко-биле чугаалаштым. Ук айтырыгга хамаарышкан чамдык байдалдарны тодаргайлап алыр арга тургустунду, ынчалза-даа чогуур түңнелдер үндүрери ам-даа элек. Шупту улус-биле харылзааны тудуп, бүгү базымнарывысты, кылдыныгларывысты чурумчудуп алган бис. Виталий Павлович шак ол болуушкунга хамаарыштыр ажылды армейжи корпустуң командылалы чорудуп турар дээрзин дыңнатты".
Чазак Даргазы шериг удуртулга органнары-биле кады мобилизастаттынган чаңгыс чер чурттугларывыстың видеобижидилге дамчыштыр дилег кииреринге чылдагаан болган байдалдарны тодарадыр ажылдың уламчылап турарын дыңнаткан.
"Бүгү шериг албанныгларны боттарының быжыглаттынган девискээринде туруштарында турар деп бисти бүзүреттилер. Эң-не кыска үе дургузунда мээң даалгам-биле ДУР-га Тываның төлээлери четкен турар ужурлуг, аңаа баргаш, байдалды олар тодарадыптарлар. Бодунуң талазындан Виталий Павлович Хоценко ДУР-нуң Чазаандан ук айтырыг дээш харыысалгалыг төлээни тодараткан" - деп, Тываның Баштыңы бижээн.
Владислав Ховалыг бо хүн оперативтиг штабтың хуралын база эрттиргеш, мобилизастаттынганнарның тодаргай шериг кезээнге быжыглаттынган турарының талазы-биле айтырыгны база оларның документилерин болур-чогууру-биле долдурган турарын сайгарып, шиитпирлээрин дааскан. Тываның шериг комиссарының оралакчызының дыңнатканы-биле, шупту мобилизастаттынган шериглер "Алушта" деп ниити армейжи системада бүрүткеттинген боорда чогуур акша хандырылгазын ап турар.
Айтырыг Тываның Чазааның шыңгыы кичээнгейиниң адаанда арткан. Ажыл ам-даа уламчылаар.
