Чоокта чаа “Херел” спорт залынга “Азия төвүнүң” шаңналы дээш хостуг хүрешке маргылдаага Красноярск крайдан, Новосибирск, Кемерово, Иркутск областарындан, Тыва, Хакас, Бурят республикалардан база Моол күрүнеден ниитизи-биле 150 мөге “спорт мастери” деп бедик атты чаалап алыры-биле күжүн шенешкеннер.
Маргылдааның аҗыдыышкынында Новосибирскиден кол шииткекчи Дамир Ярулин “Азия төвүнүң шаңналынга” 2 катап хүрешкеш, спорт мастери болганын база делегейниң тренерлериниң, мөгелериниң аразынга бодунуң шыырак белеткели-биле билдингир апарганын демдегледи. Ол ышкаш ук турнирге хамаарыштыр чамдык өскерлиишкиннерниң болганын чугаалады. Бо маргылдаага бир дугаар черни алган мөге спорт мастери деп атты 3 чыл дургузунда база бир турнирге шылгарап бадыткаарга, тыпсырын дыңнаткан.
Ол ышкаш Тываның Чазак Даргазының бирги оралакчызы В. Бартына-Сады Россияның спортчу хүрештер федерациязының мурнундан хоочуннар ортузунга делегей маргылдаазынга 8 катап шаңналдарны алганы дээш Тыва Республиканың Начын мөгези Р. Наважапка Россияның делегей чергелиг спорт мастери деп хөрек демдээн тывыскан. Турнирниң киржикчилеринге, аалчыларынга, шаңнал алган хоочуннарга хөөмейжилер уран талантызын бараалгатканнар.
Маргылдаага бирги, ийиги черлерни алган мөгелер. 57 кг – Лхамбузма Монход (Моол), Павел Сагды (Тыва); 61 кг – Кежик Седен (Тыва), Цыренжапов Дамдин (Бурятия); 65 кг – Кежик Монгуш (Тыва), Эзир Тюлюш (Тыва); 70 кг – Чаян Монгуш (Тыва), Хуужугур Кирилл (Тыва); 74 кг – Арбак Сат (Красноярск край), Сайын Казырык (Тыва); 79 кг – Семен Терещенко (Хакасия), Баяр-Сайхан Бады (Тыва); 86 кг – Хүлер Тюлюш (Тыва), Михаил Ховалыг (Тыва), 92 кг – Калин-оол Сорукту (Тыва), Шалбачы Күжүгет (Тыва); 97 кг – Бады-Маадыр Самдан (Тыва), Ганбаяр Тушинтор (Моол); 125 кг – Айдың Монгуш (Тыва), Лопсан Самбу (Красноярск край).
Үстүнде түңнелдерни өөренип көөрге, 10 деңзиниң 8-инге бистиң мөгелеривис чемпион болганнар.
/ Алексей ЧАМБАЛ-ООЛ.
Чуруктарны интернет четкизинден алган.
"Шын" №37 2023 чылдың май 23
