Июнь15-тен 18-ке чедир IV дугаар Делегей чергелиг “Азия төвүнде фанфарлар-2023” деп үрер хөгжүм оркестрлериниң фестивалы болур. Ону Ада-чурттуң Улуг дайынынче тыва эки турачы танкычыларны аъткарганындан бээр 80 чыл оюнга тураскаадып эрттирер дээн. Ооң-биле чергелештир “Енисейниң уруглары” деп I дугаар уругларның үрер хөгжүм оркестрлериниң фестиваль-мөөрейи база болур.
Фестивальдың уран чогаадыкчы удуртукчузу – РФ-тиң Чепсектиг күштериниң шериг-оркестр албанының начальниги, кол шериг дирижёр, генерал-майор, Россияның алдарлыг артизи Тимофей Маякин.
Фестивальды эрттирер эгелекчи бодалды ТР-ниң Чазааның Тимур Дулуш аттыг үрер хөгжүм оркестри идип үндүрген. Ону РФ-тиң Камгалал яамызы, ТР-ниң Чазаа, Культура яамызы, Үрер хөгжүм оркестрлериниң ассоциациязының деткимчези-биле эрттирип турар.
Фестивальга дараазында коллективтер киржир:
- РФ-тиң Камгалал яамызының Төп шериг оркестри (начальниги- Россияның алдарлыг артизи, полковник Сергей Дурыгин);
- ТР-ниң Чазааның Т.Дулуш аттыг үрер хөгжүм оркестри (дирижеру- ТР-ниң алдарлыг артизи Начын Донгак);
- 55-ки тускай мото-адыгжы (даг) бригадазының шериг оркестри (дирижеру -Петр Черников);
- Кызылдың президентиниң кадет училищезиниң шериг оркестри (дирижеру -ТР-ниң алдарлыг артизи Саян Салчак);
- “Тыва Джаз Бэнд” (дирижеру - ТР-ниң алдарлыг артизи Начын Донгак).
“Азия төвүнде фанфарлар” фестивальдарга уругларның үрер хөгжүм оркестрлериниң киржилгези чаңчыл болу берген. Олар кезээде фестивальдың дең эргелиг киржикчилери болуп артпышаан.
А бо чылын “Енисейниң уруглары” деп I дугаар уругларның үрер хөгжүм оркестрлериниң аразынга фестиваль-мөөрейни чарлаан. Ону Россияның Культура яамызының деткимчезин алган Үрер хөгжүм оркестрлериниң ассоциациязының “С тобой, страна!” чогаадыкчы төлевилели-биле эрттирер деп турар.
Чалыы хөгжүмчүлер мөөрейге киржиринден аңгыда, “Азия төвүнде фанфарлар” фестивальдың программазында кирген улуг концерттерге база киржир.
К. Монгуш белеткээн
Фестивальдың оргкомитединиң медээзи-биле
https://disk.yandex.ru/d/FH0b4g1ZQElwVg: