Июнь 16-да эртенги шакта фестивальдың киржикчилери Тиилелге шөлүнге өшпес отка чечек салыр ёзулалды кылган. Ооң соонда Ленин кудумчузун дургаар Арат шөлүнге чедир оркестрлерниң парадын, солун оюн-көргүзүүн чыылганнар сонуургап көрген.
Арат шөлүнге хемчеглер соонда, фестивальдың хүндүлүг аалчылары, сураглыг дирижерлар-биле ТР-ниң Культура яамызынга брифинг болган. Ооң киржикчилери IV дугаар Делегей чергелиг "Азия төвүнде фанфарлар - 2023" фестиваль-биле чергелештир болуп турар “Енисейниң уруглары” деп I дугаар уругларның үрер хөгжүм оркестрлериниң фестиваль-мөөрейин эрттиреринге В. М.Халилов аттыг үрер хөгжүм ниитилели, Үрер хөгжүм оркестрлериниң ассоциациязы улуг деткимчени көргүскенин онзагайлап демдеглээннер.
Ол ышкаш ТР-ниң Чазааның Тимур Дулуш аттыг Үрер хөгжүм оркестриниң 15 чыл дургузунда кылган төлевилелдери хамыкты кайгадып турар аъттыг, конькилиг оюн-көргүзүүн баралгадып, ырлавышаан, танцылавышаан хөгжүм херекселдеринге ойнап чоруур делегейде кара чаңгыс оркестр-дир деп чугаалааннар. Болган брифингиге ТР-ниң культура сайыды Виктор Чигжит Тываның аалчыларынга байыр чедирип, фестивальды деткип келгенинге четтиргенин илереткен. Ол ышкаш РФ-тиң Камгалал яамызының Төп шериг оркестри Тываның ыдык ырын ойнааш, дискиде бижидип бергени ховар белек-тир деп, ол демдеглээн.
Ол хүн В.Көк-оол аттыг Национал театрга чүгле Тываның эвес, а Россияның чоргааралы дирткен оркестрниң тургустунганындан бээр 15 чыл оюнга тураскааткан концерт болган. ТР-ниң Культура аямызының мурнундан 15 харлаан оркестрге 150 муң рубльди бээр дээнин сайыт В.Чигжит дыңнаткан.
Хөгжүмчүлер кайгамчык оюн-көргүзүү-биле база катап көрүкчүлерин өөрткен. Дирижерлар шупту сценаже үнүп, эки күзээшкиннерлиг сөс ап, оркестр-биле хөйге билдингир хөгжүм аялгаларын күүседип, езулуг найыралдың кежээзин болдурган.
Төнчүзүнде, РФ-тиң Чепсектиг күштериниң шериг-оркестр албанының начальниги, кол шериг дирижер, генерал-майор, Россияның алдарлыг артизи Тимофей Маякинниң башкарылгазы-биле оркестр "Тиилелге хүнү" деп ырны ойнай бээрге, бүдүн зал туруп келгеш, деңге ырлашкан.
К.Монгуш
Авторнуң тырттырган чуруктары
#Шынсолун#Азиятөвүндефанфарлар_ 2023
