Май 29-30 хүннеринде хоорайжыткан Каа-Хем суурда Тиилелге аттыг спорт-культура төвүнге эр-херээжен шыырак мөгелер аразынга СФО-нуң чемпионады бедик хей-аът көдүрлүүшкүннүг болуп эрткен. Аңаа СФО-нуң 10 регионундан 150 шыырак спортчу киришкен. Маргылдааның кол сорулгазы - Россия чемпионадынга СФО-ну төлээлеп киржир эргени чаалап алыры. Чемпионаттың чуруму-биле эр мөгелер 60, 66, 73, 81, 90, 110, 110 килден өрү, херээжен мөгелер 48, 52, 57, 63, 70, 78, 78-тен өрү килдерге хүрешкеннер.
Түңнелинде бистиң мөгелер база шаңналдыг черлерже киргеннер. Эр мөгелер аразынга 60 килге Делег Ондар, 66 килге Саян Хертек 3-кү черлерни алганнар. Херээжен мөгелерден Айлана Сарыглар биле Эмиля Өлзей 48 килге 3-кү черлерни, Азияна Даңзы-Белек 78 килден өрү мөгелер аразынга 1-ги черни ап, чемпион атка төлептиг болган. Азияна Даңзы-Белекке кады ажылдап чоруур эштери база республиканың иштики херектер сайыды Юрий Завьялов чемпион атка төлептиг болганы дээш изиг байырны чедиргеннер. Шаңнал кирген шыырак мөгелер Кызылга июнь 17-18 хүннеринде Россияның Кубогу дээш маргылдаага киржирлер.
Хоочун маңнакчы Радик Донгактың тиилелгези
Абакан хоорайга Николай Булакинге тураскааткан “Хаттан дүрген” деп 6 дугаар 21,1 км-ге чадаг чарыш маргылдаазы болуп эрткен. Аңаа ниитизи-биле 3015 спортчу киришкен. Бистиң республикадан спорт хоочуну, күш-культура болгаш спорттуң тергиини Радик Донгак 50-59 харлыг улус аразынга 1-ги черге төлептиг болган. Ол улуг өөрүшкү болгаш чоргаарал. “Хоочун коктуг, хола кактыг” дижир болгай.
Хоочун самбистерниң чедиишкиннери
Май 29-31 хүннеринде Кемерово хоорайның “Кузбасс Ордузунга” Россияның маадырларынга тураскааткан хоочуннар аразынга анаа болгаш дайынчы самбога Россия чемпионады болуп эрткен. Аңаа ниитизи-биле Россияның 34 булуңундан база Казахстандан 300 хире мөге хүрешкеннер. Чемпионаттың кол сорулгазы “Күштүглерни шилиири” деп төлевилелди боттандырары база ноябрь 1-3 хүннеринде Кипрге болур хоочуннар аразынга делегей чемпионадынга киржир мөгелерни шилиири. Аңаа Тываның хоочун самбистери чедиишкинниг хүрешкеннер. Боттарының килдеринге Белек-Байыр Ендан биле Михаил Алдын-оол 1-ги черге төлептиг болганнар. 2-ги черни Олег Чанчыгай база 3-кү черлерни Эрес Самбуу биле Алаксандр Монгуш алганнар. Мөгелерге чүгле эки белеткелди база делегей чемпионадынга чедиишкиннерни күзедивис.
Алексей Чамбал-оол, спорттуң хоочуну.
Чуруктарны Тыва спорт, Спорт яамызының сайтыларындан алган.
