«Төрээн дыл болгаш төрээн чогаалдың тергиин башкызы» деп Бүгү-российжи мөөрей ийи чыл улай эртип турар. Бо чылын ол мөөрейге кижизидикчи башкылар бир дугаар киришкен.
Бо чылын ук мөөрейге Россияның 75 регионундан 30 төрээн дыл эдилекчилери киржип турар. Мөөрейниң түңнел чадазы Россияның ийи регионунда эртип турар: Карачаево-Черкесск Республикаже 72 школа башкылары, а Соңгу Осетия Республика — Аланияже 32 уруглар садтарының кижизидикчи башкылары келген.
Ук мөөрейде бистиң республикадан Кызылдың 12 дугаар школазының тыва дыл болгаш чогаал башкызы Салбак Монгуш база Мөңгүн-Тайга кожууннуң Мугур-Аксы суурнуң «Хамнаарак» уруглар садының кижизидикчи башкызы Элла Донгак киржип турар. Олар бо чылдың апрель айда ук мөөрейниң регионалдыг чадазынга тергиидээш, Тываны төлээлээр эргени чаалап алганнар.
«Мөөрейге киржири – мергежилиниң аайы-биле бодун сайзырадырынга кедилиг, чаа базымнар кылырынга дыка эки арга-дыр. Ол дээрге бодуңнуң эртемиңден, школаңдан, методикаңдан дашкаар билиглер алыры-дыр, ол ышкаш черкесс чаштарга тыва дылды таныштырар арга болду» — деп, Салбак Алексеевна чугаалаан.
Элла Вячеславовна мөөрейниң бирги хүнүнде «Школа назыны четпээн чаштарга төрээн дылды сайзырадырынга тергиин практикалар» деп номинацияга киришкеш, тиилекчи болбаан-даа болза, мындыг улуг Россия деңнелдиг хемчегге киржири башкы кижиге улуг чедиишкин болган. Бо мөөрейге киржилге ыраккы кожуундан келген кижизидикчи башкының профессонал хөгжүлдезинге улуг идигни бээр дээрзи чугаажок.
Алдынай СОЯН белеткээн
“Шын” №72 2023 чылдың сентябрь 23