Эрткен хүннерде Санкт-Петербург хоорайга студентилер аразынга бокска Россия чемпионады болуп эрткен. Аңаа 94 дээди өөредилге черлеринден 17-ден 25 харга чедир 284 эр-кыс боксёрлар - юниорлар киришкен.
Апрель 16-да доозулган чемпионатты Олимпий оюннарының мөңгүн медалының ийи дакпыр эдилекчизи, ССРЭ-ниң алдарлыг тренери, профессор Алексей Кисилёвтуң чырык адынга тураскаадып эрттирген.
Ол чемпионатка ТывКУ-нуң күш-культура факультединиң студентилери, боксерлар Ай-Демир Уржанай, Эртине Солагай, Бүзүрел Ховалыг киришкен. Аныяк спортчуларны университеттиң тренер башкызы Соян Монгуш деткээн.
Түңнел оюнда ТывКУ-нуң үшкү курузунуң студентизи Бүзүрел Ховалыг Краснодар крайдан Россияның хөй дакпыр чемпиону Нуна Асатрянга каш-ла сан аштырыпкаш, мөңгүн медальды чаалап алган.
ТывКУ-нуң студентизи Бүзүрел боду Россияның кикбокска юниорларның чыынды командазының кежигүнү болгаш Европа чемпиону, Россияның кикбокска спорт мастери, бокска спорт мастериниң кандидады.
Бүзүрелдиң бичиизинден тура тренер башкызы ачазы - Март-оол Ховалыг.
#Шынсолун #TывКУ #TMG #TMGNEWS #Tuvanews
