Мөңге меңгилерлиг, бедик тайгаларга бүргеткен Бай-Тайганың эдээнде Тээли суурга Борис Фёдорович, Екатерина Седиповна Доңгурактарның өг-бүлезинге чодураалар чечектелип турар үеде оол уруг төрүттүнүп бодараан. Ол – үш кады төрээнниң хеймери. Бо бижип турар чүүлдүң маадыры – Мерген Доңгурак.
Ооң ачазы полиция чериниң машиназын мунуп, хөй чылдар иштинде үре-түңнелдиг чолаачылаан. Авазы кожууннуң төп ном саңынга пенсияже үнгүжеге чедир ажылдап келген.
Мерген Борисович мөгелер чурту ак-көк Сүт-Хөл кызы-биле 2014 чылда кудазын эрттиргеннер. Өөнүң ишти Тайгана Александр-овна – кожууннуң чер талазы-биле улуг специализи. Олар 3 оолдуң ынак ада-иези.
Дуржулгалыг чолаачы Сүт-Хөл кожууннуң мал эмчилериниң чолаачызы болуп элээн чылдар ажылдааш, 2020 чылда Сүт-Хөл район судунга чолаачылай берген.
Ол топтуг-томаанныг, кежээ кижи. Чурттап орар бажыңын боду тудуп алган. Эш-өөрүнге, дөргүл-төрелинге дузааргак. Машина-балгады үрелген улус кайы ырактан-даа аңаа кээр. Хостуг үелеринде каты, кат-иезинге оолдары-биле дузалажып, сиген-ширбиилин үргүлчү кылчып берип чоруур.
«Хол изин бут изи чандыр баспас» дээр болгай, Мерген Борисович адазын дөзээн, салгал дамчаан чолаачы. «Бичиимде миннип кээримге-ле, ачам мени машиназының хөрээнде олуртупкан чоруп турар. Ынчангаш-ла ындыг боор мен, машинаны 3-4 класска-ла башкарыптар апарган мен. Ачам машина кылырга, база чанынга көрүп өстүм» — деп чугаалаар кижи.
Мерген Борисович ажылынга дыка харыысалгалыг. Ооң-биле узун оруктарга чоруурга, бүзүрелдиг, коллектививис ооң эвилең-ээлдээн, ажылынга харыысалгалыын база дузааргаан үнелеп чоруур. Ынчангаш эрес-кежээ чолаачывыска ажыл-ижинге ам-даа чедиишкиннерни, ак орукту, аас-кежикти сеткилимниң ханызындан күзедим.
Раиса МОНГУШ, район судунуң курьери.
Суг-Аксы суур.
«Шын» №32 2026 чылдың август 20
"Шын" солуннуң МАХ-каналынга каттыжыңар: max.ru/channel_shyn