Россияның Улусчу фронтузу биле “Россияның демир-оруктары” акционерлиг ниитилел “Автопоезд” деп акцияны чарлаан.
Улусчу фронтунуң Тывада күүседикчи комитеди “Автопоезд” акцияны деткииринче республиканың хөй-ниитизин кыйгырып, ТДО-да киржип турар чаңгыс чер чурттугларывыс дайынчыларга кончуг херек, берге оруктарга чоруп шыдаар машиналарны, квадроциклдерни белеткээш, чорударын саналдаан. Хөй-ниити организацияларның, сайгарлыкчыларның, муниципалдыг эрге-чагыргаларның төлээлери “Автопоезд” акцияны деткип, ТДО-да киржип турар чаңгыс чер чурттугларывыс дайынчыларга дузалажыр деп шиитпирлээн.
Эң баштай март 22-де “Восток” акционерлиг нии- тилелдиң ажылдакчылары УАЗ Хантер машинаны көргүскен.
“Автопоезд” акцияны чарлаандан бээр ниитизи-биле 12 автомашинаны ТДО-нуң киржикчилери дайынчыларга дузаны организастаар талазы-биле Республика штавынга янзы-бүрү юридиктиг эрге-байдалдыг организациялар, тус черде ажыл-чорудулгалыг компаниялар, национал диаспоралар дамчыдып берген.
Март 30-де ыраккы Мөңгүн-Тайга биле Бай-Тайга кожууннарның төлээлери ТДО-да киржип турар чаңгыс чер чурттугларывыс дайынчыларга дуза кылдыр УАЗ Патриот биле УАЗ “таблетка” автомашиналарны Кызылга эккеп, Республика штавынга көргүскен.
“УАЗ Патриот 2014 чылда үндүрген машина. Ооң эдилели эки, чаартып, септээн соонда техниктиг байдалы тулган апарган. Дайынчыларга бүзүрелдиг хөлге болур” – деп, Мөңгүн-Тайга кожууннуң чагырга даргазы Чойган Иргит чугаалаан.
“ТДО-да киржип турар чаңгыс чер чурттугларывыс дайынчыларга дуза кылдыр бай-тайгажыларның чоруткан УАЗ машинаның техниктиг байдалы тулган эки. Ону арга-дуржулгалыг чолаачылар Украинаже чорударынга белет- кээн» – деп, Бай-Тайга кожууннуң чагыргазының даргазының оралакчызы Артыш Монгуш дыңнаткан.
Республика штавы организацияларның, компанияларның, национал диаспораларның берген машиналарының документилерин белеткээр, Абакан хоорайда демир-орук станциязынга чедирер болгаш поездиге улаштыр Украинаже чорудар ажылды 55 дугаар даг-адыгжы бригаданың командылалы болгаш бо ажылга хамаарылгалыг албан черлери-биле кады чорудуп турар.
/ Бистиң корр.
Буян ООРЖАКТЫҢ тырттырган чуруктары.
"Шын" 2023 чылдың апрель 1 №23
#Шын #Тыва #Автопоезд #БайТайга #МөңгүнТайга #ТДО
