Хүндүлүг чаңгыс чер чурттугларым!
Үнүп орар Чаа 2024 чыл-биле силер бүгүдеге Дээди Хуралдың мурнундан байыр чедирерин чөпшээреп көрүңер!
Чаңчыкканывыс ёзугаар Чаа чыл байырлалын өг-бүлевиске уткуур бис. Байырлыг ширээ артынга олурупкаш, удур-дедир белек-селектерни сунуп, кадыкшылдың болгаш аас-кежиктиң эң чылыг, чырык күзээшкиннерин бот-боттарывыска сөңнээривис чаңчыл болган. Чаа чылдың найыр-дойлуг хөөнү сеткилдеривис өөртүр.
Дооступ турар чылдың бергелери болгаш шылгалдалары бисти улам сырый каттыштырып, демнештирген. Тускай шериг операцияда киржип турар эрес-дидим чаңгыс чер чурттугларывыс үнер чылда Тиилелгени чедип алзын дей йөрээп тур бис.
Тываның хөгжүлдезин шапкынчыдар, чоннуң, ооң иштинде ТШО киржикчилериниң, аңаа чок болган маадырларывыстың болгаш оларның өг-бүлелериниң социал камгалалын күштелдирер, биче болгаш ортумак бизнести сайзырадыр, инвестицияларны көвүдедир, хоойлу-дүрүмнерин экижидер талазы-биле хөй ажылдар 2022 чылда кылдынган. Дээди Хурал чуртувустуң элээн каш субъектилери-биле, ооң иштинде Луганск Улус Республиканың Улусчу чөвүлели – парламентизи-биле кады ажылдажылга керээзин чарган.
2024 чылда шиитпирлээр айтырыгларывыс база эвээш эвес. Үре-түңнелдиг ажылды чүгле чоннуң чаңгыс деми, кызымак чоруу-биле чедип ап болур. Бурунгаарлаашкынга улуг рольду чаа салгал – аныяктар ойнаар ужурлуг. Оларның быжыг туружу, бот-идепкейи, билии, чүткүлү – чедиишкиннерниң магадылалы болур. Арга-дуржулгалыг акы-угбалары-биле демнежип тургаш, чалыы салгалывыс хөйнү кылыр дээрзинге бүзүрээр бис.
Чаа чыл бүдүүзүнде силерге ууттунмас аас-кежикти, ажыл-ижиңерге чедиишкиннерни болгаш үр чылдарда быжыг кадыкшылды күзедивис!
Чаа чыл-биле!
ТР-ниң Дээди Хуралының (парламентизиниң) Даргазы К. ДАВАА.
«Шын» №100 2023 чылдың декабрь 30
