2023 чылдың май 23-те республиканың 175 школазынга сөөлгү коңга байырлалын демдеглеп эрттирген. Кызылдың А.А. Алдын-оол аттыг 2 дугаар школазын 158 тоску классчылар база 11-ги классты 24 өөреникчи доозуп турар. Оларның аразындан 11-ги классты 2 өөреникчи алдын медальче база 9-ку классты 3 кижи кызыл аттестатче кордап турар. Оларның мурнунда база бир улуг харыысалга – күрүне шылгалдаларын чедиишкинниг дужаап алыры.
Тываның Чазак Баштыңы Владислав Ховалыг видео-харылзаа таварыштыр доозукчуларга сөөлгү коңга байырлалы-биле байыр чедирип, оларга эртем-билиг эжиин ажыдып берген буянныг башкыларның чымыштыг ажыл-ижин онзазы-биле чугулалап, доозукчуларга күрүне шылгалдаларынга болгаш келир үеде чедиишкиннерлиг болурун күзээн. Ол ышкаш доозукчуларны «улуг» амыдыралче үдээри-биле, Кызыл хоорай чагыргазының Өөредилге департаментизиниң төлээзи Айлана Ооржак, Кызыл хоорайның Төлээлекчилер хуралының депутады Роман Тамоев хүндүлүг аалчылар болуп, уругларга, ада-иелерге база башкыларга чылыг-чымчак йөрээл сөстери-биле байырын чедиргеннер.
Бөгүнгү хүннүң кол маадырларындан аңгыда, ук школаның аңгы-аңгы чылдарда дооскан доозукчулары база төрээн школазынга байыр-сөңүн чедирип, аалдап келгеннер. Оларның бирээзи школаны дооскандан бээр 45 чыл оюн демдеглеп турар 1978 чылдың 10 “в” класстың доозукчузу Геннадий Монгуш бодунуң школачы үелериниң дугайында сактыышкыннары-биле үлешкен. 1978 чылда школаны 96 өөреникчи дооскан. 1976 чылда бүгү Тывадан 9-ку классче 300 ажыг өөреникчи аразындан шылгалдалар түңнели-биле 50 хире кижи эрткеш, школаже өөренип кирип алган. Оларның доозазы школа соонда дээди эртем-билиглиг, республиканың төлептиг хамаатылары болган. Хөй-ниити палатазының даргазы Анатолий Дамба-Хууракты, прокурорнуң оралакчызы болуп ажылдаан Михаил Санчайны, алдарлыг чурукчу Май-оол Чоодуну, республиканың Улус өөредилгезиниң болгаш РФ-тиң эртем ажылдакчыларының профэвилел даргазы Надежда Охемчикти, Россияның алдарлыг эмчизи Юлия Дамбаны, РФ-тиң алдарлыг башкызы Ольга Базырны база Наталья Кууларны хамаарыштырып болур.
Май 24-те Кызыл хоорайның школаларының 9 класс доозукчулары 2613 өөреникчи күрүне шылгалдазын дужаар. Оларның аразындан 64 кижи кызыл аттестат-биле доозарын кордап турар. Ол ышкаш 898 11-ги классчылардан 54 доозукчу алдын медаль-биле школаны доозар сорулгалыг, шылгалдаларга белеткелин уламчылап турар. Оларның мурнунда улуг сорулга – шылгалдаларны чедиишкинниг дужаап алгаш, мергежил чедип алыры.
Байырлалдың сөөлгү коңгазын эң-не эки өөренир, үлегерлиг доозукчу биле бирги классчы чаяр дээрзин шупту билир бис. Кызылдың А.А. Алдын-оол аттыг 2 дугаар школазының шак ындыг өөреникчилери 11 “б” класстың доозукчузу Начын Очур-оол болгаш 1 “а” класстың өөреникчизи Ясмин Чигжит «Сөөлгү коңганы» чаяр аас-кежиктиг болган.
/ Алиса ДОНГАК.
Начын АҢГЫР-ООЛДУҢ тырттырган чуруу.
"Шын" №37 2023 чылдың май 23
