РФ-тиң Чазак Даргазының оралакчызы Татьяна Голикованың даалгазы-биле чурттуң бүгү регионнарының эмнелгелери, ФАП-тар болгаш кадык камгалалының эге чадазының эмнелге шугумунуң албан черлери чаңгыс аай аянны киирери-биле ажылды чорудуп эгелээн. Ону Россияның Кадык камгалал яамызы «Национал приоритеттер» автономнуг хөй-ниити организациязы-биле кады ажылдап кылган. Эмнелге ажылдакчыларының хеви, эмчи өрээлдери, медээлер булуңнары, аарыг кижилерниң эмчи хүлээп алыышкынынче оочур үезинде оларга эптиг болуру-биле манаашкын зоназы дээш эмнелге чери бүрүнү-биле чаңгыс аай аянны сагыыр ужурлуг.
Барыын-Хемчикте ММЦ-ниң удуртулгазы эмнелге албан черин база ажылдакчыларының чаңгыс аай аянныг (стильдиг) болурунуң ажылын чорудуп турар. «Кадыкшыл албаны» деп чаа бренд аарыг кижилерге эмчилээринге, эмнелге ажылдакчыларынга ажылдаарынга таарымчалыг байдалдарны тургузуп турар.
Барыын-Хемчикте ММЦ-ниң медээзи-биле Алиса ДОНГАК белеткээн.
