Чаңгыс аай соңгулдалар хүнү сентябрь 10-да республикага муниципалдыг тургузугларның 9 Төлээлекчилер хуралдарының 621 депутадының соңгулдалары болуп эрткен.
Тыва Республиканың соңгулда комиссиязының даргазы Лариса Андалаева соңгулдаларның кандыг эрткенин чугаалап, баш бурунгаар түңнелдериниң дугайында каксы дыңнадыгны массалыг информация чепсектеринге берген.
Чаңгыс аай соңгулдалар хүнүнде 8.00–20.00 шактарда чаңгыс хүннүң бадылаашкыннары 95 соңгулда участоктарынга болганын, аңаа 63 муң соңгукчу киришкенин, ол дээрге соңгукчуларның 82 хуузу дээрзин ТР-ниң соңгулда комиссиязының даргазы демдеглээн.
Төлээлекчи эрге-чагырганың аңгы-аңгы деңнелдериниң төлээлекчи органнарының депутаттарынга 711 кордакчы бүрүткеткен: “Чаңгыс демниг Россия” – 620, РЛДП – 36, РФКП – 12, “Чөптүг Россия” – 3, боттарының кандидатуразын идип үндүргеннер – 40.
118 дугаар участок соңгулда комиссиязы Туран хоорайның девискээринге Россияның Төп соңгулда комиссиязының “Мобильная УИК” шенелде төлевилелин боттандырган. Участок комиссиязының тускай белеткелди эрткен кежигүннери бажыңнарны кезип, мобильдиг капсырылганы ажыглаарынга хамаарыштыр тайылбыр ажылын чоруткан.
Соңгулдаларның ажык-чарлыын хандырар дээш, бүрүткелди эрткен 323 хайгааракчының хайгааралы-биле соңгулдалар эрткен. Соңгулда участогунуң бүрүзүнге-ле ортумаа-биле 3 хайгааракчы турган.
Бадылаашкын хүнүнде 14 девискээр соңгулда комиссияларының девискээринге болгаш бадылаашкынның 95 черинге офлайн видео-хайгааралды дүне-хүндүс организастаан.
Соңгукчуларның бадылаашкыннарын санаарынга тускай комплекстерни 7 соңгулда участоктарынга ажыглаан.
Соңгулдаларның кандыг эрткенинге хамаарыштыр хомудалдар чаңгыс аай соңгулдалар хүнүнде кирбээн.
Соңгулдаларның түңнелдерин күштүг кылдыр хүлээп көргенин Лариса Андалаева демдеглээш, соңгулда комиссияларының шиитпирлерин массалыг информация чепсектеринге чырыдарын дыңнаткан.
Ш. МОҢГУШ.
«Шын» №68 2023 чылдың сентябрь 13