Чоокта чаа Сүт-Хөл кожууннуң Кызыл-Тайга сумузунуң Шомаадыр Куулар аттыг культура одаанга РФ-тиң Президентизи Владимир Путинниң Айыткалы-биле 2023 чылда чарлаттынган «Башкының болгаш дагдыныкчының чылының» байырлыг ажыдыышкыны болгаш школа иштинге болуп эрткен «Чылдың башкызы» мөөрейниң түңнелдерин үндүрген хемчег болуп эрткен. Хемчегге ук кожууннуң Төлээлекчилер хуралының даргазы Андрей Хертек, кожууннуң чагырга даргазының оралакчызы Алдын-Херел Ондар, өөредилге эргелелиниң төлээлери Наталья Сарыглар, Татьяна Монгуш байыр чедирип келгеннер.
Кызыл-Тайга ортумак школазының амыдыралынга хөй чылдарның дургузунда улуг үлүг-хуузун киирип, ажылдап чораан болгаш ам-даа ажылдавышаан, башкыларга «Сүт-Хөл кожууннуң хүндүлүг чурттакчызы» атты байырлыг хемчегге тывыскан. Шогдуп Ондар, Юлия Күжүгет, Лидия Ондар, Берзат Ондар, Вера Монгуш, Аниса Монгуш олар хүндүлүг аттың эдилекчилери болган.
«Чылдың башкызы» Ондармаа Ондар, а «Чылдың кижизидикчи башкызы» Буяна Монгуш, «Аныяк башкы» Даяна Ондар, «Психолог башкы» Чодураа Күжүгет, «Чылдың эр тергиин башкызы» Мерген Монгуш, «Кижиниң кижизидикчизи» Долаана Ондар, «Бүгү Россия чергелиг төрээн болгаш орус дыл мастер-клазының мастери» Чинчи Ондар болгаш Аяна Куулар олар төлептиг болган.
Байырлыг хемчегни ыры-хөгжүм, оюн-тоглаа-биле уламчылаан.
/ Бистиң корр.