Баштайгы машиналар

Россияның Улусчу фронтузу биле “Россияның демир-оруктары” акционерлиг ниитилел “Автопоезд” деп акцияны чарлаан. Тывадан тускай дайынчы операцияның киржикчилери дайынчыларга дузаны организастаар талазы-биле Республика штавының хуралы март 21-де болуп эрткен. Ол хуралга хөй-ниити организацияларның, сайгарлыкчы ниитилелдиң болгаш албан черлериниң төлээлери киришкен. Улусчу фронтунуң Тывада күүседикчи комитеди “Автопоезд” акцияны деткииринче республиканың хөй-ниитизин кыйгырып, ТДО-да киржип турар чаңгыс чер чурттугларывыс дайынчыларга кончуг херек, берге оруктарга чоруп шыдаар машиналарны, квадроциклдерни белеткээш, чорударын саналдаан. Хөй-ниити организацияларның, сайгарлыкчыларның, муниципалдыг эрге-чагыргаларның төлээлери “Автопоезд” акцияны деткип, ТДО-да киржип турар чаңгыс чурттугларывыс дайынчыларга дузалажыр деп шиитпирлээн.

Украинада ТДО-да киржип турар чаңгыс чер чурттугларывысче чорудар машиналарны “Автопоезд” акцияның киржикчилери ТДО-нуң киржикчилери дайынчыларга дузаны организастаар талазы-биле Республика штавынга март 22-де көргүзүп эгелээннер.

“Восток” акционерлиг ниитилелдиң ажылдакчылары УАЗ Хантер машинаны көргүскен. Россияның Улусчу фронтузу биле “Россияның демир-оруктары” акционерлиг ниитилел “Автопоезд” деп акцияны чарлаарга-ла, “Восток”-туң коллективи машинаны белеткеп эгелээнин акционерлиг ниитилелдиң чиңгине директору Сергей Уюсов массалыг информация чепсектериниң ажылдакчыларынга дыңнаткан. Бо бүдүрүлгеден элээн каш ажылдакчылар ТДО-да киржип турар. Оларның-биле доктаамал харылзажып турар болгаш, канчаар дериттинген машина дайынчыларга херегин билип алгаш, оолдарның чагыы ёзугаар машинаны дерээн. “Восток”-туң оолдары кайда, кайы шериг кезекте турары билдингир болгаш, УАЗ Хантерни ыяап-ла оларга чедирер ужурлуг.

“Восток” акционерлиг ниитилелдиң коллективи мооң мурнунда-даа ТДО-да дайынчыларга дузалажып, тулчуушкуннарга херек коптерлер, тураннар дээш өске-даа дериг-херекселдерни, идик-хеп аймаан саткаш, чорудуп турган. Аңаа ниитизи-биле 4 млн. рубльди чарыгдаан, моон-даа соңгаар дузалажыр.

Кызыл кожууннуң албан черлериниң бирээзи база Украинада ТДО-да киржип турар чаңгыс чурттугларывысче чорудар УАЗ машинаны көргүскен. Дайынчы хөделиишкиннерге ажыглаар кылдыр бо машинаны чоокку хүннерде таарыштыр бүрүнү-биле дериптер.
Берге оруктарга чоруп шыдаар, дайынчы хөделиишкиннерге ажыглап болур машиналарны дериирин доозуп, көргүзеринге белеткеп турарының дугайында дыңнадыглар ТДО-нуң киржикчилери дайынчыларга дузаны организастаар талазы-биле Республика штавынга кожууннардан болгаш Кызыл хоорайдан кээп турар.
Украинаже чорудар машиналарны апрель 10-да Абакан хоорайда демир-орук станциязынга чедирер ужурлуг. Оон ыңай “Россияның демир-оруктары” акционерлиг ниитилел улаштыр сөөртүп чоруптар.

Бистиң корр.