Барыын-Хемчик кожууннуң Аяңгаты суурда «Эзирлер уязы» губернаторнуң төлевилелиниң күүселдези-биле туттунган биче спорт залды байырлыг байдалга ажыткан. Тываның спорт сайыды Владимир Тулуш аңаа киржип, төлевилелдиң боттаныышкынынга үлүг-хуузун киириштирген школаның, уруглар садтарының, Барыын-Хемчик чагыргазының идепкейжи төлээлеринге өөрүп четтириишкинниң бижиктерин тывыскан.
Кожуун чагыргазы төлевилел езулуг-ла чоннуң тудуу болганын демдеглээн. «Эзирлер уязын» суурнуң эр кижилери боттары туткан болза, херээжен чон тудугжулар долу күжү-биле ажылдаар кылдыр изиг болгаш тодуг аъш-чемнер-биле хандырган. «Бо күш-дамыр белеткелиниң спорт залы болурундан аңгыда, тыва черниң езулуг эзирлерин өстүрер чер, спортчу салым-чаяанын каңнаар уя болур»— деп, тус черниң чурттакчылары өөрүшкүлүг демдеглээннер.
Чаа спорт залын ажыткан дораан-на аңаа хостуг хүрешке мастер-классты эрттирген. Оолдар профессионал аргаларны шиңгээдип, чагыг-сүмелерни кичээнгейлиг дыңнааннар.
Республикада кол инвестор – «Эльбрусметалл-литий» компанияның деткимчези-биле Аяңгатыда спорт залының тудуу эрткен чылын эгелээн. Амгы үениң чаа болгаш таарымчалыг оран-савазы уругларның спортчу арга-мергежилин сайзырадырынга, кадыкшылын быжыглаарынга, хостуг үезин ажыктыг организастаарынга хөй аргаларны бээр. Залда хүрежиринге херек бүгү чүүлдер бар.
Тываның Баштыңы Владислав Ховалыг регионнуң социал инфраструктуразын хөгжүдер дээш, инвестор компания-биле кады кылганы төлевилелдиң бирээзи-дир дээрзин демдеглээн. Амгы үеде «Эльбрусметалл-литий» компанияның деткимчези-биле Тываның Кызыл-Даг, Бай-Даг, Чыраа-Бажы, Самагалдай, Кызыл-Тайга, Ак-Тал суурларда «эзирлер уязының» тудуу чоруп турар.
Аяңгатыда спорт залының ажыдыышкыны республиканың эрге-чагырга органнарының регионда спорт инфраструктуразын хөгжүдер талазы-биле улуг ажылының түңнели. «Эзирлер уязы» губернатор төлевилели элээн каш чылдар дургузунда чедиишкинниг боттанып, Тываның кожууннарында дөртен хире биче спорт залдарын туткан. Ооң кол сорулгазы– школачыларны болгаш аныяктарны спортче, ылаңгыя республикада эң-не нептереңгей спортчу хевирлерниң бирээзи хүрешче хаара тударында. Тудугну чоннуң киржилгези-биле тудуп турар, а республиканың Спорт яамызы тудуг материалдарын хандырар, муниципалитет өске шупту чарыгдалдарны бодунга хүлээнип алыр.
Ыяштан кылган сес-булуңчук хевирлиг спортчу объектини ийи кезекке чарган: кол залды хүрешке белеткенир чер кылдыр, а немелде өрээлдерни солуттунарынга база тренерлерге тускайлаан.
Бистиң корр.
Чурукту Тыва Чазактың парлалга адырындан алган.
“Шын” №20 2026 чылдың май 28
"Шын" солуннуң МАХ-каналынга каттыжыңар: max.ru/join/egenQ...