Республиканың найысылалы Кызыл хоорайга Тываның Баштыңы Владислав Ховалыг база бир чугула амыдырал-хандырылга чери “Водоканал-Сервис” КХН-ге четкен.
Найысылалды суг-биле хандырып турар албан чериниң ажыл-ижинден чурттакчы чоннуң амыдыралының шынары хамааржыр. Кызылдың чоокку үеде өзүп-сайзырап, хөй аал чурттаар каът бажыңнарның доктаамал туттунуп турары-биле коммунал четкилери көвүдеп турар. Ук албан черинге Владислав Ховалыг четкеш, келир күскү-кышкы үеге кайы хире беленин хынаан. Боттарының ээлчээнде КХН-ниң төлээлери амгы үеде кылып турар ажылының кайы хире чоруп турарын база чедиишкиннери болгаш нарын айтырыглары-биле удуртукчуну таныштырган.
Ажыл-агыйжы чугаалажыышкыннар соонда “Водоканал-Сервис” КХН-ниң тергиин ажылдакчыларын шаңнап-мактаар байырлыг ёзулал болган. Чуртталга-коммунал ажыл-агый адырынга ак сеткилдиг ажылы дээш “Водоканал-Сервис” кызыгаарлыг харыысалгалыг ниитилелдиң суг арыглаар станциязының ажылдакчызы Алексей Берниковка, канализация участогунуң узаныкчызы Артыш Күжүгетке, транспорт участогунуң чолаачызы Буян Дүмен-Чыргалга, юридиктиг консультантызы Марина Ооржакка Тыва Республиканың Баштыңының Өөрүп четтириишкин бижиктерин тывыскан. Ол ышкаш чуртталга-коммунал ажыл-агыйынга хөй чылдарда ак сеткилдиг ажылы дээш ук албан чериниң суг хандырылгазының участогунуң машинизи Надежда Сойновага, участок оператору Мерген Монгушка, суг хандырылга участогунуң начальниги Сергей Фокинге Тыва Республиканың Баштыңының Хүндүлел бижиктерин тывыскан. Оларның аразында хөй-хөй чылдар дургузунда ажылдап каан хоочуннар-даа, боттарының мергежилинге тергиин көргүзүглерлиг болган аныяк-даа специалистер-даа бар.
«Силерниң ажылыңар – Кызылда өг-бүле бүрүзүнүң чаагай чоруунуң үндезини болур. Силерниң хүн бүрүде берге ажылыңарның ачызында хамаатыларның бажыңнарында арыг суг кезээде бар, а коммуналдыг системазы үрелиишкин чок ажылдап турар. Суг хандырылгазының талазы-биле улуг сорулгалар мурнувуста бар. Силерниң коллективиңер оларны ажып эртер дээрзинге бүзүрээр мен» — деп, Владислав Ховалыг онзалап демдеглээш, коммунал инфраструктуразын хөгжүдери Чазактың мурнады хөгжүдер айтырыгларының бирээзи болуп артканын демдеглээн.
Ол хүн “Водоканал-Сервистиң” коллективинге онзагай хүн болган. Олар төлептиг шаңналдарны алырындан аңгыда, боттарының ажылынга кайы хире ажыктыын миннип, улам-на хей-аът киргеннер.
Владислав Ховалыг бодунуң командазының ажылын сайгарып, организацияның ажылдакчыларының айтырыгларынга база харыылаан. Эрге-чагырга моон-даа соңгаар найысылалдың суг хандырылга системазын деткип чаартырын ол айыткан.
Чыжыргана СААЯ.
Ада Тюлюштуң тырттырган чуруктары.
“Шын” №36 2026 чылдың сентябрь 17
"Шын" солуннуң МАХ-каналынга каттыжыңар: max.ru/channel_shyn