Тывада автозаправка станцияларыныӊ ээлери сентябрь 19-тан тура республика бюджединден субсидия ап болур.
Чонга садар бензин өртээн чиигедири-биле түр үеде ындыг хемчег алганыныӊ дугайында Тываныӊ Баштыӊы Владислав Ховалыг социал четкиде блогунга бижээн:
«Республикада АЗС-тер ээлери бензин өртээн бадырарынга белен. Регионнуӊ Одаар чүүл болгаш энергетика яамызы оларга субсидия бээриниӊ чуруму-биле керээ чарып алгаш, ат салырынга белен. Чугаа АИ-92, АИ-95 маркалыг бензин болгаш солярка дугайында чоруп турар. Керээ ёзугаар алырга, чиигеткен өртек-биле саткан 1 литр бензин дээш сайгарлыкчыларга республика бюджединден 3 рубльди төлеп бээр. Ол дээрге чурттуӊ кывар-чаар чүүлдер садар рыногунда байдал турумчуп, бензин-даа, дизель-даа өртээ чиигей бээринге чедир түр үеде сагыыр дугуржулга-дыр. Баш бурунгаар даап бодаашкыннар-биле алырга, ол октябрь эгезинде болур ужурлуг. Хакасиядан кывар-чаар чүүлдү мөөӊү-биле эккеп турар чедирикчилер биле сайгарлыкчыларныӊ керээ чарып алырынга база дузалажыр бис. Бензинни эккеп алырынга бергедээшкиннер кажан-даа тургустунмас болурунга база дузалажыр. Бай-Хаакта автозаправка станциязыныӊ керээ чарып алырынга ынчаар дузалаан бис. Кызылда, Каа-Хемде, Чадаанада АЗС-тер ээлери база шак ынчаар керээ чарып алыксап турар. Регионалдыг Одаар чүүл болгаш энергетика яамызы күзелдиг улусту манап турар».
Тываныӊ Баштыӊы Владислав Ховалыг кывар-чаар чүүлдер рыногунда ажылдап турар сайгарлыкчы бүрүзү деткимчени ап болур дээрзин айыткан.
ТР-ниң Чазааның медээлеринден Р. ДЕМЧИК очулдурган.
“Шын” №71 2023 чылдың сентябрь 20
Эдуард КУУЛАР:
– Кывар-чаар чүүл өртээниң өскенин барымдаалааш, күрүне деткимчезиниң ачызында регионга кывар-чаар чүүл өртээн бадырар дугайында шиитпирни Чазак деңнелинге хүлээп алган. Кывар-чаар чүүлдү соңгаартан хууда сайгарлыкчылар сөөртүп эккеп турар деп шупту билир бис. Олар оон каш хуу немээш, садып-саарып амыдырап турар. Ол дээрге сайгарлыкчыларның амыдыралы-дыр. А кывар-чаар чүүлдүң өртээнге күрүне деткимчези болур 3 рубльди керээ чарып алган сайгарлыкчыларга республиканың бюджединден төлеп бээр.
Кызыл хоорайга 6 рубльден, а кожууннарга 8 рубльден өстүрбезин сүмелеп турар бис. Сайгарлыкчылар-биле дугуржулгавыстың кол утказы болза, олар бистиң айыткан өртээвистен өстүрбес. Хоорайга чүгле 6 рубль немээр турган болза, олар чүгле 3 рубль немээш, кывар-чаар чүүлдү садар. Арткан 3 рубльди күрүне төлеп бээр. А кожуунга 5 рубль немээш, садарлар. Күрүне керээ чарып алган сайгарлыкчыга 3 рубльди немей төлеп бээр.
Сайгарлыкчылар-биле ужуражылгалар уламчылап турар. Тывада ниитизи-биле 40 хире сайгарлыкчы кывар-чаар чүүл садып-саарып ажылдап турар.
Хууда сайгарлыкчылар ооң мурнунда 1 литр кывар-чаар чүүлдүң өртээниң кырынга 9 рубль немеп турган болза, а ам 6 рубль немээр. Чонга 1 литрни 56 рубльга садыпкаш, ооң ылгалы 3 рубльди күрүне керээге даянгаш төледип алыр.
Бистиң корр.
“Шын” №71 2023 чылдың сентябрь 20