2022-2023 өөредилге чылында Бай-Тайга кожууннуң В. Б. Кара-Сал аттыг Тээли ортумак школазын 24 өөреникчи доозуп турар. Оларның аразындан 3 тергиин өөредилгелиг доозукчу Юлия Ламажык, Раджана Аптыыла база Тайгана Салчак школаны алдын медаль-биле дооскан. 11 “А”, “Б” класстарның удуртукчу башкылары – Шончалай Сендажы база Элеонора Байдос.
Бай-Тайга кожууннуң чагырыкчызының хүлээлгезин күүседип турар Аржан Хертек доозукчуларга, оларның башкыларынга, ада-иелеринге байырын чедиргеш, үделгениң чагыын берген.
— Чуртталгаңарда база бир нарын болгаш чугула үе-чаданы, күрүне шылгалдаларын эрткен силер. Школаны силер кончуг эки доозуп, башкыларыңар берген билиглерин бадыткап, холга алдын медальдарны алганынарга, аңгы-аңгы угланыышкыннарда шылгалдаларның көргүзүглерин бедик тутканыңарга өөрүп тур мен.
Бышкан билиглиг болуп, улуг амыдыралче бирги базымнарны баскан силер. Мурнуңарда өөредилге черинче кирип алыр дугайында чугула айтырыг бар. Кижи бүрүзү шын орукту шилип алыр дээрзин бүзүрээр мен. Эң-не кол чүүл – шилип алган мергежилиңер, ажыл-херээңер силерниң сагыш-сеткилиңерге тааржыр болуру күзенчиг.
Хүндүлүг ада-иелер болгаш башкылар! Шыдамык чорууңар, мерген угааныңар, кызымак ажыл-ижиңер-биле уругларыңарга бүгү талалыг деткимчени көргүстүңер. Ажыл-ижиңерниң эки түңнелдиг болганы дээш өөрүп четтиргеним илередип тур мен!
Оолдар болгаш уруглар! Кандыг-даа эртем чедип алзыңарза, төрээн чер-чуртуңар силерни кезээде манап турар. Тывавыска салым-чаяанныг аныяктарның чогаадыкчы көрүжү кезээде херек. Чуртталгаже бурунгаар көрүштүг болуңар. Кандыг-даа бергелер таваржып келзе, торулбаңар! Силерге бүзүреливис улуг. Чедиишкинниг болуңар. Ак орукту күзедим!
/ Алиса ДОНГАК белеткээн.
