«Биче хоорайларны болгаш төөгүлүг черлерни сайзырадыры» деп шуулган Владивосток хоорайга болуп турган. Тергиин эки төлевилелдерни шилип, Бүгү-российжи VIII-ки мөөрейни аӊаа түӊнээн.
Россияныӊ тудуг сайыды Ирек Файзуллин ук мөөрейниӊ киржикчилеринге байыр чедирбишаан, ооӊ тиилекчилерин хөйге чарлаан. Тываныӊ тудуг сайыды Аяс Хунай-оол баштаан республиканыӊ делегациязы шаӊнал тыпсырының байырлыг ёзулалынга киришкен.
Биче хоорайларныӊ овур-шинчизин утка-шынарлыг кылдыр тургузарыныӊ талазы-биле Чадаана хоорайныӊ «Тос кожууннуӊ төвү», Ак-Довурак хоорайныӊ «Ак тоолчургу чугаа» төлевилелдери бедик үнелелди чаалап алгаш, тиилекчилер аразынче кирген.
Бүгү-российжи мөөрейге республиканыӊ өмүнээзинден киришкеш, тиилээн төлевилелдерниӊ авторларынга, төлевилелди камгалап турган командага Тываныӊ Баштыӊы Владислав Ховалыг байыр чедиргенин социал блогунга бижээн:
«Чурттуӊ Президентизиниӊ деткимчези-биле мөөрейниӊ фондузун үргүлчү көвүдедип турар, ооӊ ачызында элээн хөй биче хоорайларны чаагайжыткан. Арга-шинээ болгаш саӊ-хөөзү чок-даа болза, кижилерниӊ ажыл-амыдыралын сайзырадып чурттаксаар күзел бар».
«Ак тоолчургу чугаа» деп төлевилел-биле Ак-Довурак хоорайныӊ Центральная кудумчузун болгаш ооӊ чоок-кавы девискээринде хөй-ниити черлерин чаагайжыдып кылыр.
«Тос кожууннуӊ төвү» төлевилел-биле Чадаана хоорайныӊ сесерлииниӊ бүгү девискээрин чаагайжыдар.
Үстүнде ийи төлевилелди 2024–2025 чылдарда амыдыралга боттандырары-биле республикага 145 млн рубль үндүрүп бээр. Владислав Ховалыгныӊ бодалы-биле алырга, ол ажылдарны шынарлыг кылыры болгаш дыштанылганыӊ чаа объектилерин улаштыр камныг эдилээри чугула.
Ооӊ мурнунда Бүгү-российжи мөөрейге киришкениниӊ ачызында Тываныӊ ийи хоорайынга чаа парктарны тургускан. Баштайгы орус чурттакчыларныӊ парыгын Туранда кылган. Азия төвүнүӊ көшкүн чоннарыныӊ парыгын Шагаан-Арыг хоорайда амгы үеде кылып турар.
ТР-ниӊ Чазааныӊ медээлеринден Р. ДЕМЧИК белеткээн.
"Шын" №55, 2023 чылдың июль 26