ТР-ниң Кадык камгалал яамызы Бүгү-делегейниң эки турачылар хүнү-биле эки турачы ажылда хаара туттунган, бир дугаар кыйгы-биле дуза кадып чедип кээр кижилерге, ылаңгыя эки турачы эмчилерге байыр чедирген.
Оларның коронавирустуң эң-не нептереңгей тарап турган үезинде эмчилерге вакцинация чорударынга дузалап, колл-төптерге дүн-хүн чок ажылдап, аарыг улуска бажыңнарынга эмнерни, улуг назылыгларга болгаш чединмес өг-бүлелерге аъш-чемни чедирип турганын яамы бедик үнелел-биле демдеглеп турар. Волонтерларның бо ажылы- берге үеде буянныг чорук кылырының үлегерлиг чижээ болган.
Эмчилерниң эки турачылар шимчээшкини Тывага 2017 чылда тургустунган. Республиканың эмчи колледжиниң келир үениң эмчилери болур студентилери кадыкшылды камнаарының дугайында янзы-бүрү акцияларга киржип, организастаарынга, ажыктыг медээ бижээн буклеттер тарадырынга, келир үеде эмчи болуксаан өөреникчилер аразынга суртаал ажылын чорударынга идепкейлии-биле дузалажып турар.
Амгы үеде бо эки турачылар #МЫВМЕСТЕ деп ТШО-да киржип турар дайынчыларга ачы-дуза чедирилгезиниң штавында ажылдап, мобилизация-биле чоруткан чаңгыс чер чуртугларывыстың өг-бүлелеринге чогуур дузаны чедирип турар.
Эмчи волонтерлар хан кудар станция-биле база сырый харылзаалыг, чугула херек үеде хан дужаар улусту тып, мөөңнеп, дузалап турар. Чоокта чаа оларже бир херээжен кижи дуза дилеп четкен. Ооң берге байдалда чыдар бичии оглунга дораан хан херек апарган. Ынчан 35 эмчи волонтерлар дораан келген. Бичии оолга дээш хан дужааган эмчи колледжиниң студентилери болур эки турачыларның чүгле сезиниң ханы тааржып, оолдуң амы-тынын алырынга чугула херек ханны бергеш, дузазын көргүскен. Оолдуң авазы четтиргенин илередип, эки турачыларга чигирзиг белектерни сөңнээн. Шак мындыг таварылгалар чаңгыс эвес удаа болуп турарын демдеглевес арга чок. Шанып-ла дуза хереглээн улуска бир дугаар кыйгы-биле донорлап, дузазын чедирип турар оолдар-уруглар боттарының кылган ажылын хөйге чарлап турбас-даа болза, ону эскербейн баары болдунмас.
Чонга ачы-дузазын көргүзүп чоруур эки турачының школазын эрткен оолдар-уруглар келир үеде ниитилелиң элитазы болур дээрзинге чигзиниг турбас. Чаагай херек кылып чоруурларга аас-кежикти болгаш ажыл-амыдыралынга чедиишкиннерни күзедивис!
ТР-ниң Кадык камгалал яамызының медээзи-биле.
