ТГШИ амгы үеде тыва дылды “Яндекс. Очулдурукчуже” киирер дээш, сөстер, сөстер каттыжыышкыннарының болгаш домактарның очулгазының ажылдарын чорудуп турар.
ТР-ниң Чазак Даргазының оралакчызы Орлан Сарыглар «Яндекс. Очулдурукчу» сервиске тыва дылды киирер талазы-биле ажылчын бөлүк-биле ээлчеглиг ужуражылга үезинде ажыл планынче эдилгелерни киирип, очулдурукчулар командазының составын бадылаанын дыңнаткан.
– «Яндекс. Очулдурукчу» сервиске тыва дылды тургузар дизе, бир сая орус-тыва эжеш домактарны чыыры негеттинип турар. Ынчан бис делегейниң кандыг-даа дылындан, англи болгаш кыдат дылдардан тыва дылче дээн чижектиг, сөзүглелдерни очулдуруптар аргалыг апаар бис.
Амгы үеде 275 муң чергелешкен очулгаларны очулдурукчулар командазы чыып алган. «Яндекс. Очулдурукчуже» тыва дылды киирерде, бир сая чергелешкен очулгалыг сөс каттыжыышкыны негеттинип турар. Мурнувуста кылыр ажыл ам-даа хөй – деп, ТР-ниң Чазак Даргазының оралакчызы чугаалаан.
Ноябрь 1-ге чедир ук ажыл доостур, чыл төнчүзүнге чедир хыналда ажылдарын доозар. Февраль 1-ге чедир системаже кииреринге белеткелди эрткен турар ужурлуг.
Онлайн-сөстүктер, очулдурукчулар, тыва дылдың шын бижилге дүрүмнерин хынаар система, дылды өөрениринге таарымчалыг электроннуг шөлчүгештер, тыва дылдың национал корпузу, чугаа дылын танып, билип кааптар синтезатор, тыва дыл кырынга чугааланып турар үн дузалакчызы дээн ышкаш чурагайжыдылга ажылдары планда көрдүнген. Үстүнде айыткан бүгү-ле ажылдарның үндезин таваа – тыва сөстерни болгаш сөстер каттыжыышкынын системаже киирери.
Тыва дылды кадагалап арттырары база ону улаштыр хөгжүдер сорулга-биле интернет четкизинче тыва дылды киирери – Тываның гуманитарлыг болгаш социал-экономиктиг шинчилелдер институдунуң эртем ажылының база бир чугула угланыышкыннарының бирээзи. Ук ажылдарны Тываның Баштыңы Владислав Ховалыгның деткимчези-биле чорудуп турарын сагындыраал.
А. ХЕРТЕК
“Шын” №81 2023 чылдың октябрь 25