Тываның Баштыңы Владислав Ховалыг чаңгыс партийжилери – Күрүне Думазының депутаттары Дмитрий Хубезов база Айдың Сарыглар-биле ужурашкан.
Тываның Баштыңы республиканың эмнелге албан чериниң ажылдакчыларынга эргежок билиглерни база катап сагындырып, практиктиг кичээлдерни эрттирип чоруур, буянныг иштиң маадырлары эмчилерге база чаңгыс үзел-бодалдыг партийжи эштеринге четтиргенин илереткен.
РФ-тиң Күрүне Думазының кадык камгалал комитединиң удуртукчузунга ажылдаан медицина эртемнериниң доктору, тускай шериг операциязының киржикчизи Дмитрий Анатольевич Хубезов Думада Тываның депутады Айдың Сарыгларның чалалгазы-биле кайгамчык чараш черде келгенин чугаалааш, тыва чоннуң эвилең-ээлдээн демдеглээн.
Арга-дуржулгалыг ийи эмчи Кызылда Аныяктар ордузунга эмнелге черлери база өөредилге организациялары, корум-чурум тудар органнар база эки турачы каттыжыышкыннар төлээлери-биле ужуражып, бирги эмчи дузазын көргүзеринге мастер-классты эрттиргеннер. Озал-ондактыг хай-халап болган таварылгаларда бирги эмчи дузазын үе-шаанда шын чедиргенинден, кижиниң амы-тынын камгалап алыры дыка хамааржырын Дмитрий Анатольевич тайылбырлаан. Бо билиглерни билири кайы-даа үелерде ажыктыг дээрзин угааткан.
Дмитрий Хубезов эмчи дузазы чедирип, доктаамал аай-дедир чоруп турарындан комитет даргазы албан-хүлээлгезин хүлээткеш, “Чаңгыс демниг Россияның” гуманитарлыг ажыл-чорудулгазы-биле волонтер эмчилерни ажылын дүүштүрер ажылды бодунда хүлээнип алганын сагындыраал.
Мастер-класстың киржикчилери сертификаттарны алган.
А. МОНГУШ.
“Шын” №41 2024 чылдың июнь 5
