“Өөредилге” национал төлевилелдиң “Профессионалитет” федералдыг төлевилели-биле эрттирип турар “Профессионалдар” чемпионадынга Тываның техникумнарының, колледжтериниң сургуулдары база школачылар март 18-тен 23-ке чедир боттарының билиг-мергежилин, салым-чаяанын көргүзүп мөөрейлешкен. Ниитизи-биле 33 угланыышкынга болгаш 3 аңгы назы-харлыг аныяктар, элээдилер аразынга болуп эрткен. Апрель 3-түң хүнүнде мөөрейниң регионалдыг чадазын түңнеп, тиилекчилерни шаңнап-мактаан. Аңаа 17 ортумак өөредилге черлеринден, ТывКУ-дан болгаш найысылалдың 7 аңгы школазындан шупту 202 кижи киришкен.
Чемпионаттың бо чадаларын эрттирерде, угланыышкыннарның даңзызын Тывада хереглеттинип турар мергежилдерни көрүп тургаш тургускан. Бо чылын 4 чаа угланыышкын немей ажыттынган. Ол ышкаш бо чылдың база бир чаа чүүлү – “Дагдыныкчы башкы” деп бөлүктү кииргени.
Чемпионаттың маргылдааларынга “Уругларга болгаш улуг улуска немелде өөредилге” деп чаа угланыышкын-биле Кызылдың педагогика колледжизиниң 2-ги курузунуң сургуулу Аюш Арагат киришкеш, тиилекчи болган.
“Мөөрей 3 хүн дургузунда уламчылап келди. Аңаа киржири меңээ кончуг солун-дур. Бир дугаар киржип турар кижиге улуг арга-дуржулга-дыр. Мастер-класстарны, ажык кичээлдерни, ада-ие хуралын болгаш өске-даа өөреникчилерниң хостуг үезин хаара тудар хемчеглерни эрттирдим” – деп, ол чугаалаан.
Маргылдаа 10 аңгы шөлчүгештерге болуп эрткен. Оларга Тываның аңгы-аңгы өөредилге албан черлери болгаш ТывКУ хамааржыр. Киржикчилерниң ажылдарын 232 эксперт үнелеп көрген. Оларның иштинде 30 кол, 189-у дагдыныкчы болгаш 43-ү индустриалдыг эксперттер бар. Тиилекчилерни акша сертификаттары-биле шаңнаан. Олар бо чылын ноябрь айда Санкт-Петербургка болуп эртер мөөрейниң Бүгү-российжи чадазынга Тываны төлээлеп киржир.
“Бо ажылда эң-не кол чүүл – бистиң экономикавыска шыырак тускай эртем-билиглиг кадрлар херек. Ону чедип алырда, ортумак профессионал өөредилгениң быжыг системазы чокка болдунары берге” – деп, Тываның Баштыңының оралакчызы Орлан Сарыглар демдеглээн.
“Дагдыныкчылар болгаш дагдыныкчы башкылар аразынга 2 угланыышкынны кылдывыс. Ол дээрге кижизидикчилер база эге класс башкыларының аразынга мөөрейни эрттиргени. Регионалдыг чаданың тиилекчилери дараазында регионнар аразының чемпионадынга барып киржир” – деп, республиканың профессионал өөредилге төвүнүң килдис даргазы Очур Куулар дыңнаткан.
Политехниктиг техникумнуң 2-ги курузунуң сургуулу Начын Анай поварлар аразындан эң-не тергиин болган. Ооң чем кылыр салым-чаяанын эксперттер магадаан.
“Чаа-чаа солун кижилер-биле таныжып, чаа билиглер, арга-дуржулга шиңгээдип алыр дээш, бир дугаар киржип чедип келдим. Эъттиг изиг чем, балыктан стейк, десерт кылырынга 4 шак берген” – деп, ол чугаалаан.
“Бистиң сорулгавыс киржикчилерниң ажылдарын эксперттер бөлүүнүң үнелээрин организастаары. Олар 3 хүн дургузунда ажылдаан. Киржикчилер 9 модульду кылганнар. Киржикчилер кончуг эки белеткенген болду” – деп, мөөрейниң кол эксперти Наталья Маркина чугаалаан.
Бо чылын мобильдиг капсырылга кылыры, немелде өөредилге, күш-культура болгаш фитнес деп чаа угланыышкыннар база немешкен.
Бо мөөрейниң Бүгү-российжи чадазынга Тыва чаңгыс эвес удаа шаңналдыг черлерни эккеп турганын чемпионаттың регионалдыг оператору Очур Куулар демдеглээн: “2013, 2016, 2018 чылдарда бистиң чаңгыс чер чурттугларывыс шаңналдыг черлерже кирип турган. 2016 чылда көдээ ажыл-агый машиназын кылырынга чартык финалга мөңгүн медальдың эдилекчизи база бар”.
Бо чемпионат студентилерге боттарын көргүзүп, Тываның-даа, Россияның-даа албан черлеринге стажировканы эртип, ажылга тургустунуп алыр арганы берип турар.
Чыжыргана СААЯ.
Чуруктарны интернеттен алган.
«Шын» №26 2024 чылдың апрель 6
