«Арганыӊ курт-кымыскаяктарыныӊ делегейи» деп уругларныӊ чогаадыкчы кылыглар мөөрейин Тыва Республикага бо чылын бир дугаар эрттирген.
Акцияныӊ кол сорулгазы дээрге арга-арыг амыдыралынга уругларныӊ сонуургалын бедидип, бойдусту камнап хумагалаарынга, ооӊ каас-чаражын үнелеп билиринге кижизидери база салым-чаяанныг чаштарныӊ чогаадыкчы чоруун сайзырадыры.
Мөөрейге Мөӊгүн-Тайга, Каа-Хем, Улуг-Хем, Чөөн-Хемчик, Бии-Хем, Тес-Хем кожууннарныӊ болгаш Кызыл хоорайныӊ шупту 21 өөредилге албан черлери 127 ажылды киириштирген.
Уруглар чочагай, ине болгаш калбак бүрүлер, тоорук, чөвүрээ, чиӊгис, куш чүглери, ракушка болгаш чайзат даштардан аӊгыда, пластик сава, СД-диск, сывырындак демир, саазын, пластилин дээш өске-даа материалдарны ажыглап, онза чараш уран шевер чогаадыкчы ажылдарын бараалгаткан.
Ажыл бүрүзү онзагай, шилилге берге болган дээрзин жюри демдеглээн. Тыва Республиканыӊ арга-арыг камгалалыныӊ төвү, Убсунур ыйгылаажы заповедниктиӊ, Кызылдыӊ арга-арыг ажыл-агыйыныӊ төлээлери түңнеп, тергиин эки ажылдарны шилээн.
«Арганыӊ курт-кымыскаяктарыныӊ делегейи» деп мөөрейиниӊ регионалдыг чадазыныӊ тиилекчилерин ноябрь 20-де байырлыг ёзу-биле шаӊнаан.
Россияныӊ арга-арыг камгалалыныӊ салбыры Тыва Республиканыӊ арга-арыг камгалалыныӊ төвүнүӊ специалистери тиилекчилерге дипломнарны, хүндүлел бижиктерни болгаш тураскаалдыг суй белекти тывыскан.
/ Р. ДЕМЧИК белеткээн.
«Шын» №89 2023 чылдың ноябрь 22
