Шаанда кончуг дээн аңчы ашак чурттап чораан чүве-дир. Бир катап чааскаан аңнап чорааш, өөр эликтерге таваржы бергеш, чээрби тос эликти доозазын ол-ла черинге кыра адып каапкан. Үр-даа болбаанда он ийи эликти база чаңгызын-даа арттырбайн кыра адып каапкан дижир.
Ооң соонда үр-даа болбаанда аңчының коданынче кодан шөө-бөрү халдааш, кажаага турган шээр болгаш бода малын эңдере тудуп каапкан. Кажаа эжии быжыг кылдыр шарыттынмаанындан аалдың малы дүне бөрүлерден дескеш, тайга-сын кырынче тоо-быдарадыр маңнажып чоруй барган. Аалдың ээлери «сен-мен» дижип, «кажааның эжиин кым бакка шараан?» дижип, аразында алгыжып-кыржып арткан. Хөй аң аткан аңчы дуңмазын боолапкаш, ол-ла дораан боду бооланыпкан. Ынчангаш тыва кижи оранның аңын кожалары-биле деңге үлежир, өйлеп чиир деп улуг улус ажы-төлүнге чагып, сургап чораан.
/ О. ОНДАР.
Чурукту ГигаЧатка чураан.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...