Июнь 23–25 хүннеринде Сүбедей спорт өргээзинге Делегей чергелиг хол бөмбүүнүң маргылдаазы көрүкчүлерниң сонуургалын оттуруп, бедик деңнелге болуп эрткен. Маргылдааны Россияга волейбол спортунуң 100 чылдаан оюнга уткуштур, Тываның волейбол федерациязының президентизиниң шаңналы дээш эр ойнакчылар аразынга эрттирген.
Ниитизи-биле маргылдаага 8 эр команда киришкен. Бистиң республикадан 6 команда база аалчылар: Моол күрүнеден Улан-Баторнуң студентилери база Улан-Удэниң күрүне университединиң командалары.
Маргылдааның шииткекчилери: Тараачы Хомушку, Света Тотошева, Дажы Чечена. Шииткекчилерниң чугаазы-биле алырга, бо делегей чергелиг турнир Тывага хол бөмбүүн сайзырадырынга база ойнакчыларның мергежилин бедидеринге улуг идигни берип турар.
Чита хоорайда областың алдарлыг ажылдакчызы, бедик мергежилдиг волейболчулар белеткеп турар, Россияда билдингир тыва тренер башкы Александр Хүрепаевич Дангытты чалап, тренерлерниң билиин бедидер өөредилгени чорудар деп турарын хоочун волейбол ойнакчызы, Дээди Хуралдың Даргазы Каң-оол Давааның дыңнаткан.
Бо удаада шыырак 4 команданың санынче кирип, 3 дугаар шаңналдыг чер дээш Моолдуң Улан-Батор хоорайдан студентилер командазы биле Кызылдан “Дөгээ” командазы солун оюнну көргүзүп, 5 партияны ойнааннар. Түңнелинде, 3 биле 2 санга Моолдуң командазы уткаш, 3 дугаар шаңналдыг черже кирген. Моолдуң командазында ойнакчы тренер О.Мөнх-Оргил 2019 чылда делегей чемпионадының киржикчизи база Азия чемпиону, тергиин ойнакчы деп шаңналды алган. Бир дугаар чер дээш Улан-Удэниң күрүне универсидетиниң командазы 3 биле 0 санга Кызылдың ОБЯ командазын уткаш, турнирниң чемпион адынга төлептиг болганнар.
Деткикчилер маргылдааның тиилекчилеринге 1-ги черниң дипломнарын, медальдарны база Кубокту, ол ышкаш 100 муң акшаны команданың тренери Яна Намсаровага тывыскан.
Ийи-үш дугаар черлер алган командалар дипломнар, медальдар база 80, 60 муң рубль шаңналдарны алганнар.
Тускай шаңналдар: тергиин халдакчы Александр Содунов (Бурятия) база тулган Камгалакчы Ховалыг Кежик (ОБЯ) болганнар. Моолдуң Өлгий Цагаан компаниязының директору Лхагва Ундрах база Кызыл хоорайда Моолдуң чиңгине консулу Ч. Ганболд Тыва Республиканың волейбол президентизи Чингис Каминовту хөрек демдээ-биле шаңнааннар.
Алексей ЧАМБАЛ-ООЛ.
Чурукту интернеттен алган.
“Шын” №47 2023 чылдың июнь 28
