Октябрь 5-те Тываның Чазааның бажыңынга Башкының хүнүнге тураскаадып байырлыг езулалды эрттирген. Аңаа республиканың өөредилге адырының ажылдакчыларынга күрүне шаңналдарын тывыскан.
Шаңнаашкын езулалын ажыдып тура, Тываның Баштыңы Владислав Ховалыг чыылганнарның мурнунга сөс чугаалаан:
«Силер дөгереңер кончуг нарын-даа бол, буянныг мергежилдиң төлээлери болгай силер. Ылап-ла силерден, силерниң педагогика адырынга мергежээниңерден, мерген угааныңардан, шыдамыккайыңардан, өөреникчилерге сагыш-сеткилиңерниң кичээнгейинден бо шагның аныяк-өскени улуг кижиниң амыдыралынче кандыг билиглерлиг кирип турары хамааржыр. Бөгүн дыка хөй башкылар бедик шаңналдарны ап турарынга өөрүп тур мен. Силерниң ажылыңар ниитилелге чугула херек болгаш кандыг-даа шаңналга төлептиг” – деп, Владислав Ховалыг чугаалаан.
Ооң соонда шылгараңгай башкыларга күрүне шаңналдарын байырлыг байдалга тыпсыр езулал болган.
Тыва Республиканың «Шылгараңгай күш-ажылы дээш» медальды Мугур-Аксында уругларның уран чүүл школазының баян клазының башкызы Демир-оол Салчакка, өөредилгениң хоочуну Александр Адымачиге, Кызыл хоорайның М.А. Бухтуев аттыг 1 дугаар школазының физика башкызы Галина Суховага, кадыкшылының шинээ кошкак уругларның 10 дугаар школазының орус дыл болгаш чогаал башкызы Тамара Курыгинага тывыскан.
«Тыва Республиканың өөредилгезиниң алдарлыг ажылдакчызы» атты Кызыл хоорайның Немелде өөредилге төвүнүң улуг башкызы Гульнара Чудиновскихге база Улуг-Хем кожууннуң Чааты суурда К.О. Шактаржык аттыг школаның эге класстар башкызы Зинаида Эртинеге тывыскан.
«Тыва Республиканың культуразының алдарлыг ажылдакчызы» атты Чеди-Хөл кожууннуң Хову-Аксы суурда уругларның уран чүүл школазының эстрада-джаз салбырының башкызы Шолбан Кууларга тывыскан.
Ол ышкаш Тыва Республиканың Баштыңының хүндүлел бижиктерин дараазында башкыларга тывыскан:
Кызыл кожууннуң Сукпак суурда уругларның уран чүүл школазының директору Орлан Сотпага, Ак-Довурак хоорайның 1 дугаар ортумак ниити билиг школазының эге класстар башкызы Татьяна Доңгакка, Чаа-Хөл кожууннуң Чаа-Хөл суурда Ш.Ч. Сат аттыг ортумак ниити билиг школазының төөгү болгаш ниитилел билиглериниң башкызы Оксана Кара-Салга, Кызыл хоорайның 9 дугаар гимназиязының химия башкызы Наталья Артемьевага, Барыын-Хемчик кожууннуң Кызыл-Мажалыктың 2 дугаар школаның эге класстар башкызы Валентина Тандар-оолга, Тес-Хем кожууннуң Ү-Шынаа школазының тыва дыл болгаш чогаал башкызы Алла Хертекке, Таңды кожууннуң Сосновка школазының социал педагогу Антонина Сыратка, Тываның агроүлетпүр техникумунуң төөгү башкызы Ким Оюнга.
Тыва Республиканың Баштыңының Өөрүп четтириишкинин хостуг хүреш талазы-биле М.А. Чечен-оол аттыг олимпийжи курлавырлар спорт школазының тренер башкызы Меңги Монгушка, Кызыл хоорайның 11 дугаар школазының директорунуң информатизация талазы-биле оралакчызы Павел Вороновка, Кызылда президентиниң кадет училищезиниң башкызы Ай-Мерген Күжүгетке, Тываның көдээ ажыл-агый техникумунуң тускай эртемнер башкызы Елена Мананниковага болгаш Шагаан-Арыг хоорайда назы четпээн уругларның «Солнышко» өөредилге чериниң улуг башкызы Людмила Дажы-оолга тывыскан.
Артур ХЕРТЕК белеткээн.
Чиңгис СААЯНЫҢ тырттырган чуруктары.
«Шын» №76 2023 чылдың октябрь 7