Чазын чанар куштарымны манап ор мен,
Чаныксааштың бергедээн боор, хөөкүйлерим ...
Соок кыштың тыныжын ам чавырылдыр
Солчуп келир частың чылыы шонуп келди.
Чаныксааштың далаш-дулаш девидээр дээш,
Чаа-дайын оруу-биле ушпайн көргер!
Чазыыл октар дээпсе канчаар. Айыыл болур.
Чаны-биле оя бээрин оваарыңар!
Чашкы шаамдан четтикпейн манаар чаңчыл
Шак-ла ынчаар мээң-биле артып калган.
Харлар эрип, карандылап эгелээрге,
Хараачаже бакыланып, хараныр мен.
Дуруяалар, дээлдигеннер, сайлыктарым,
Ыяңгылыг ырлашпышаан сүрүштүр кээр.
Ынак, төрээн черин көргеш, сеткил сергеп,
Туман өттүр өткүт эдип, үнүн салчыр.
Чазын дедир чанып келир куштар-биле,
Чаа-дайын шөлдеринде дайынчылар
Калчаа, дерзии араатанның когун үскеш,
Кады, деңге чанып келгер. Ужуп келгер.
Кымнар кайда, кайыын чанып олурарын,
Кыры-биле ужуп оргаш, ончалаңар.
Төрээн черниң оолдарын таныыр силер,
Дөгерезин арттырбайн хынап көргер.
Башкылары мурнай ужуп чанып келгеш,
Бажыңнарда манааннарга медээлеңер.
Чанган куштар соо-биле соңнуг-мурнуг
Чаага тиилээн тиилекчилер чанып келзин!
Чаңгыс өдек куштарын-даа, оолдарын-даа,
Чаза манап, дүн-хүн санап чоруур чон бар.
Чаңгыс аай шуут дөгереңер чанып кээрге,
Час шаг ынчан хөлбеңнедир частып келзин.
Чазын чанар куштарымны манап ор мен,
Чаныксааштың бергедээн боор, хөөкүйлерим ...
Ажы-төлүн, ынак эжин манааннарга
Аас-кежик чазы болзун! Амгы бо час...
Чазын дедир чанып келир куштар-биле
Чаа-дайын шөлдеринде дайынчылар
Калчаа, дерзии араатанның когун үскеш,
Кады, деңге чанып келзин! Манап аар бис!
Орлан Дамба-Хуурак
“Шын” №17 2026 чылдың май 7
"Шын" солуннуң МАХ-каналынга каттыжыңар max.ru/join/egenQ...