Хол бөмбүүнге маргылдаага Доора-Хем школачыларының чедиишкини
Москва облазында Раменск хоорайга июнь 8-14 хүннеринде 2009-2010 чылдарда төрүттүнген уруглар аразынга Бүгү-россия чергелиг “Мөңгүн бөмбүк” деп хол бөмбүүнүң түңнел маргылдаазы болуп эрткен.
Аңаа девискээрлер аразынга тиилекчи 16 команда киришкен. Маргылдааның кол сорулга- зы – “Хол бөмбүүн школаже” база “Спортту школаже” деп төлевилелдерни боттандырары. Түңнел маргылдаага бистиң республикадан Доора-Хемде Л.Б. Чадамба аттыг школаның уруглар командазы демниг, туруштуг, чараш оюну-биле 3-кү черни алганы – улуг чедиишкин. Команданың кежигүннери: Анастасия Оюн, Дынгылаа Хертек, Меңги Дамбый, Алдын-Сай Амыртаа, Алдын-Сай Хомушку, Амина Хомушку. Уругларның улуг чедиишкининге тренер башкы Долума Омаковна Дүлүштүң кызымак, эки түңнелдиг ажылын демдеглээр апаар. Ол ышкаш школаның директору Артур Дажымаевич Монгуштуң база ада-иелерниң деткимчезин, киирген үлүг-хуузун айтыры чугула.
Бокска СФО-нуң чемпионнары
Омск хоорайга июнь 15-20 хүннеринде 19-40 хар чедир эр, херээжен шыырак боксерлар аразынга Александр Малунцевтиң адынга тураскааткан СФО-нуң чемпионады болуп эрткен. Аңаа Сибирьниң 10 девискээринден 100 хире боксерлар киришкеннер.
Чемпионаттың ажыдыышкынынга Омск облазының губернатору Виталий Хоценко база Бокс чөвүлелиниң удуртукчузу Кирилл Подольский боксерларга изиг байырны чедирбишаан, спортчу чедиишкиннерни күзээннер.
Ол чемпионатка бистиң республикадан дараазында тренерлер С.К. Чимбиян, С.Ш. Лопсанай, Р.А. Монгуш база Ч.М. Кууларның белеткээн боксерлары чедиишкинниг киришкеннер. Боттарының удурланыкчыларын бүгү талазы-биле ажып, чараш боксту 48 килге Дмитрий Айдышаа база 57 килге Соян Монгуш көргүзүп, бирги черге төлептиг болганнар. Дараазында 3-кү черлерни 54 килге Алаш Куулар, 60 килге Каң-Демир Сендимаа, 75 килге Эртине Солагай, 48 килге Алдын-Сай Иргит алган.
Тыва боксту бедик деңнелге көдүрүп чоруур боксерларга, тренерлерге, Бокс чөвүлелинге, деткикчи “Эльбруссметалл-Литий” компанияның удуртулгазынга өөрүп четтирбишаан, Россия чемпионадынга спортчуларывыска чүгле тиилелгени күзедивис.
Шыдыраага “Азия төвүнүң” тиилекчилери
Кызылда чаа туттунган 22 дугаар школага июнь 12-18 хүннеринде 9, 11, 13, 14, 15 хар чедир оолдар, уруглар аразынга “Сибирьниң тергииннери” деп Бүгү-россия чергелиг шыдыраа фестивалының “Азия төвү” чадазының 2 дугаар маргылдаазы бедик деңнелге болуп эрткен.
Маргылдаага 5 девискээрден 152 элээди назы-харлыг шыдыраачылар күжүн хынап киришкеннер. Фестивальдың кол сорулгазы — Сибирьге бичии оолдар, уруглар аразынга шыдырааны эки сайзырадып, шыырак ойнакчыларны илередири. Маргылдааның кол шииткекчизинге Кемерово облазындан бүгү Россия чергелиг шииткекчи Дементий Игорьевич Пышнограй чалаткан. Маргылдааның ажыдыышкынында ТШО-нуң киржикчизи Экер-оол Манчын шыдыраачыларга эки, кичээнгейлиг ойнаарын чагып, байырны чедирбишаан, чүгле тиилелгени ойнакчы бүрүзүнге күзээн.
Фестивальдың киржикчилери доктааткан үелиг (классиктиг партия) 9 оюнну ойнааннар. Дараазында маргылдаага дүрген (блицке) оюнга күзелдиг ойнакчылар киришкеннер. Баштай 9 хар чедир уруглар аразынга оюннарга 1-ги черни Антонина Маадыр-оол, 2 дугаарын Айше Ондар, 3-кү черни Ай-кыс Байуара алганнар. Оолдар аразынга 1-ги черни Сайын Сайфуллин, 2 дугаарын Антон Түлүш (Приморск край), 3-кү черни Александр Шатов (Хакас Республика) алганнар. 11 хар чедир уруглар аразынга 1-ги черни Угулза Малбай-оол, 2 дугаарын Айшона Монгуш, 3-кү черни Долзат Торе, оолдар аразынга 1-ги черни Дамба Ондар, 2 дугаарын Глеб Телесницкий (Хакас Республика), 3-кү черни Самба Ондар алганнар. 13 хар чедир уруглар аразынга 1-ги черни Далида Чамурлиева, 2 дугаарын Сувуд Куулар, 3-кү черни Чайзат Торе, оолдар аразынга 1-ги черни Владимир Куулар, 2 дугаарын Тимур Иргит, 3-кү черни Отсурен Ондар алганнар. 15 хар чедир назынныг уруглар аразынга 1-ги черни Ананда Доңгак, 2 дугаарын Анастасия Ооржак, 3-кү черни Байслана Севээн, оолдар аразынга 1-ги черни Начын Чамзы, 2 дугаарын Мөңгүн Сарыг-Лама, 3-кү черни Дүгер Допай алганнар.
Маргылдааны Шыдыраа чөвүлелиниң удуртукчузу Данжуур Доржунуң база Спорт яамызының деткимчези-биле бедик деңнелге эрткенин демдеглээр апаар. Тиилекчилер болгаш 2-3 дугаар черлерни ээлээн уруглар, оолдар шупту медаль, диплом, акша сертификаттарын шаңналга алганнар. Элээди шыдыраачыларга эки белеткелди база моон-даа соңгаар маргылдааларга чедиишкинниг киржирин күзедивис.
Россия Кубогунга Сүге-Маадыр Каң-Демирниң тиилелгези
Кызылда Тиилелге аттыг спорт болгаш культура төвүнге июнь 19-21 хүннеринде шыырак эр, херээжен спортчулар аразынга Россияның Кубогу дээш дзюдо маргылдаазы бедик деңнелге болуп эрткен. Аңаа Россияның 36 девискээринден 172 шыырак дзюдоистер киришкеннер. Маргылдаага мөгелерниң киришкениниң кол сорулга- зы – октябрь айда Россия чемпионадынга киржир эргени чаалап алыры.
Маргылдааның ажыдыышкынынга Тыва Республиканың Чазааның Даргазы Владислав Ховалыг база спорт сайыды Владимир Түлүш, Спортчу командалар белеткээр төптүң директору Буян Бурбучук база Россияның Дзюдо чөвүлелиниң кежигүннери спортчуларга изиг байырны чедирип, маргылдаага чедиишкиннерни күзээннер. Россияның Дзюдо чөвүлелиниң удуртулгазы бистиң республикада дзюдонуң эки сайзыралын база улуг, бичии спортчуларның чедиишкиннерин деткиири-биле 2026 чылда Кубокту Кызылга эрттирерин шиитпирлээн турган.
Тренер башкылар Вячеслав Монгуш, Олег Сендажи, Хеймер-оол Ондар, Дадар-оол Дугур-оолдуң шудургу ажылының база оларның өөреникчилери Шораан Допай, Саян Ондар, Саян Хертек, Альберт Монгуш, Демир Бодан-оол, Джени Чамыян, Ачыты Добуу, Сүге-Маадыр Каң-Демирниң кызымаккайының түңнели бедик тиилелгелер болган. Дзюдо чөвүлелиниң удуртукчулары Иван Хураган, Бадан-оол Түлүш, Роберт Доржу, Чаян Доржу, спорт школаларының директорлары Аркадий Шутов, Владимир Түлүш олар деткикчилээни база дузалыг болган.
Кубок маргылдаазынга дараазында спортчулар дуржулгалыг тренерлерниң дузазы-биле эки белеткелди эрткеш, чедиишкинниг киришкеннер. 60 килге самбога делегейниң 3 дакпыр чемпиону, Россияның алдарлыг спорт мастери, тренер башкы Саян Хертек, 2025 чылда Россияның хүлер медализи, Россияның спорт мастери Сүге-Маадыр Каң-Демир, 66 килге спорт мастеринге кандидат СФО-нуң чемпиону Делег Ондар, 73 килге спорт мастеринге кандидат СФО-нуң хүлер медалының эдилекчизи Начын Күжүгет, 81 килге Россияның спорт мастери, 2011 чылда Россия чемпионадының хүлер медалының эдилекчизи Ай-Херел Балчакпан база спорт мастеринге кандидат, СФО-нуң хүлер медалының эдилекчизи Шолбан Куулар тиилелгелерни чедип алганнар. Херээжен спортчулар аразынга 78-тен аар килге республикада Иштики херектер яамызының ажылдакчызы, Россияның спорт мастеринге кандидат, 2026 чылда СФО-нуң чемпиону Азияна Данзы-Белек чедиишкинниг хүрешкеннер.
60 килге Каң-Демир Сүге-Маадыр (тренери Темир Монгуш), 66 килге Герман Кобец (Свердловск облазы), 73 килге Магомед Маштаев (Чечен Республика), 81 килге Клим Калинин (Челябинск облазы), 90 килге Эльдар Аллахвардиев (Тюмень облазы), 100 килге Асан Аугалиев (Тюмень облазы). Москвада Олимпийжи курлавырлар училищезиниң сургуулу Очурбад Чамыян (тренери Темир Монгуш) тиилелгелиг хүрешкен.
Херээжен спортчулар аразынга 48 килге Аина Моисеева (Свердловск облазы), 52 килге Валерия Козлова (Краснодар край), 57 килге Дарья Кузьмина (Свердловск облазы), 63 килге Александра Балабанова (Ханты-мансы автономнуг округ), 70 килге Дарья Антонова (Волгоград облазы), 78 килге Надежда Татарченко (Свердловск облазы), 78 килден өрү Дарья Речкалова (Свердловск облазы) маргылдаага тиилелгелиг черлерже үнген. Чемпионнар база 2-3 дугаар черже кирген спортчулар медальдарны, дипломнарны, 100, 75, 50 муң рубль акшаларның сертификаттарын алганнар.
Россияның Дзюдо чөвүлелиниң даргазы Сергей Соловейчик республиканың удуртулгазынга, Спорт яамызынга, Дзюдо чөвүлелинге, Спортчу командалар белеткээр төптүң удуртулгазынга, тренерлеринге, ажылдакчыларынга Россия чергелиг маргылдааны эки деткип эрттиргени дээш, өөрүп четтириишкинниң бижиин чоруткан.
Дзюдо республикага ам-даа эки сайзырап, делегей база Олимпий оюннарының чемпионнары төрүттүннер-ле болзунам деп курайладывыс!
/ Алексей ЧАМБАЛ-ООЛ, спорттуң хоочуну.
Чуруктарны Спорт яамызының, Дзюдо федерациязының сайтыларындан алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...