2023 чылдың Наадымынга тураскааткан аът чарыжы Тос-Булакка болуп эрткен.
Чеди-Хөл кожууннуң Хендерге сумузунуң чүгүрүк аът мунукчузу 21 харлыг Милена Маскыр хамыкты кайгаткан.
8 километр черге 2 харлыг 95 богбаны чарыштырган. Улуг-Хемниң Торгалыгдан Орлан Санчының Калчан-Доруу мурнап келген, ону Артаа Сайын мунган. 2-ги черге Өвүр кожуундан Чорумал Ойдупааның Ирбис-Доруг деп чүгүрүк малы халып келген. Ооң мунукчузу – Арсен Серин. 3-кү черни Чөөн-Хемчиктиң Чадаана хоорайдан Эртине Саттың Калчан-Боразы алган. Калчан-Бораның мунукчузу Артыш Моңгуш.
15 километр салыгга 4 харлыг аныяк 104 чүгүрүк маңнаан. Чөөн-Хемчиктен Дайза Моңгуштуң Хүрең деп аъды мурнап келген. Чүгүрүк Хүреңни Даш-Шивээ Күжүгет мунган.
Эрзинниң төлээзи Эчис-Балчир Нурзаттың Шилги аъдын Даниил Дандан 2-ги черже киир мунган. 3-кү черни Чөөн-Хемчик кожуундан Евгений Кууларның Калчан-Доруг деп аъды алган, ооң мунукчузу Сергек Куулар.
Улуг аъттар салыынга 127 чүгүрүк киришкен. Олар 30 километр черге халаан. Наадымнарның сес дакпыр чемпиону, Улуг-Хемден Байыр Доржунуң Доруг аъды мурнай халып келген. Доругнуң мунукчузу – Эртине Балчий. 2 дугаарында Улуг-Хемниң төлээзи Сылдыс Анай-оолдуң Бора аъды халып келген. Сай-Белек Чигжит Бораның мунукчузу. 3 дугаарында Чөөн-Хемчик кожууннуң төлээзи Артыш Моңгуштуң Сарыг-Доруг деп аъды келген. Аюш Ховалыг Сарыг-Доругну мунуп чораан.
10 километр черге дөрт харлыг челер болгаш чыраалаар аъттарның салыынга 42 аът халаан. Таңдының төлээзи Буян Ооржактың Кара деп аъдын Садыя Ондар мунуп алгаш, финишче 1 дугаар кире халдып келген. Улуг-Хемден Александр Күдер-оол Бора чүгүрүүн боду мунуп алгаш, 2 дугаарында халдып келген. 3 дугаарында Бии-Хемден Айдың Начынның Саян-Доруг деп аъды халып келген. Мунукчузу – Аймир Моңгуш.
Дөрт харлыг челер аъттарның салыынга 36 чүгүрүк халаан. 1 дугаарында Кызыл кожуундан Радомир Иргиттиң Доруг аъды келген. Ай-Хаан Моңгуш мунган. 2–3 дугаарында Кызыл кожууннуң төлээзи Аяс Хомушкунуң Калчан-Доруг биле Калдар деп ийи аъды кире халып келген. Айрат Содунам болгаш Белек Сарыглар чүгүрүктерни мунган.
15 километр черге дөрт хардан өрү назылыг улуг чыраа аъттар салыынга 21 чүгүрүк киришкен. 1 дугаарында Өвүрнүң төлээзи Артемий Дагбыштың Калдар аъды келген. Ону Адыгжы Хуурак-оол мунуп чораан. 2 дугаарында Кызыл кожуундан Айдыс Салчактың Калчан-Доруг аъды келген. Мунукчузу – Арзылаң Ооржак. 3 дугаарында Чөөн-Хемчик кожууннуң төлээзи Аңчы Моңгуштуң Бора аъды халып келген.
Айдың ОНДАР.
Буян ООРЖАКТЫҢ тырттырган чуруу.
"Шын" №61, 2023 чылдың август 19
