Республиканың Иштики херектер яамызының күрүнениң автоинспекциязының ажылдакчылары-биле кады Автооруктарга күрүне хайгааралының федералдыг албанының Тыва Республика талазы-биле килдизиниң инспекторлары автомобиль оруктарынга озал-ондакты болдурбас сорулга-биле пассажирлер аргыштырылгазының транспорт аймаанга хыналдаларны үргүлчү чорудуп турар.
Эрткен неделяда бо албан чериниң инспекторлары полиция ажылдакчылары-биле кады Кызыл хоорайның иштинге болгаш ооң чоогунда девискээрге пассажирлер аргыштырып турар автобустарның хыналдазын чоруткан. Январь 18-тиң хүнүнде 7 “А” дугаарлыг маршрутка «ГАЗ-322132» марканың автобузун доктааткаш, ооң чолаачызының документилерин хынаан. Чолаачының пассажирлер аргыштырарынга күрүнениң чөпшээрел документилери чогун автооруктарга күрүне хайгааралының инспекторлары илереткен.
Транспорт аймаа-биле чөпшээрел чок сайгарлыкчы чорукту боттандырганы дээш, РФ-тиң административтиг корум-чурум үрээшкиннериниң кодекизиниң негелделери ёзугаар чолаачыга административтиг хемчег онаар дугайында протоколду тургускан. Бо административтиг корум-чурумну үрээни дээш чолаачы 50 000 рубль түңнүг торгаал акшаны күрүнеге төлээр.
Чогуур чөпшээрел документилер чокка Кызыл хоорайның иштинге болгаш кожууннар аразынга пассажирлер аргыштырып турар автобус чолаачыларын Автооруктарга күрүне хайгааралының федералдыг албанының Тыва Республика талазы-биле килдизиниң ажылдакчылары илередип келгени ында-хаая таварылгалар эвес. Чижээлээрге, январь 16-ның хүнүнде Кызылга, 6 дугаарлыг маршрутка пассажирлер аргыштырарынга чөпшээрел документилер чок автобус чолаачызын илереткен.
ТР-ниң Иштики херектер яамызының медээзинден Ш. МОНГУШ белеткээн.
«Шын» №6 2024 чылдың январь 27
