“Сферум” деп өөредилге хевири башкыларга, ада-иелерге болгаш республиканың өөреникчилеринге «Шаңналдар» деп адырда ачы-дуза хүлээлгезин бараалгаткан. Ооң ачызында башкылар өөредилгеге сундулуг өөреникчилерниң өөредилгеге, спортка, өөредилгеден дашкаар ажыл-чорудулгага чүткүлүнге идиг бээр шинектиг апаар. “Сферумнуң” ажыглакчылары видео-харылзааларны чара номчуп, ооң дузазы-биле башкыларның чөвүлел хуралдарының азы ада-иелер хуралдарының бижимел сөзүглелдерин шалыпкыны-биле ап болур апаар. Сөөлгү версияже ажылдакчылар чугула дыңнадыглар хүлээлгезин база немээн – ук хүлээлге өөредилге талазы-биле бижижигниң херек болгаш чугула дыңнадыын хилис эрттирбейн барбас.
Моон соңгаар башкы кижи шаңналдарны өөреникчилерге класстың чадынга-даа (арынынга-даа) тыпсып болур.
“Сферумнуң” эгезинде алды шаңнал бар. Өөреникчи бүрүзү ооң кайы-бирээзин чаңгыс катап алыр, ынчалзажок ук шаңнал өөредилге хевиринге кезээ мөңгеде кадагалаттынып артар болгаш шупту улуска көскү болур.
Тергиин илеткел дээш «Алдар-макталдың шагы» шаңналга төлептиг болуп болур, “Билип алыксадым” кичээлге идепкейлиг ажыл дээш шаңнал, а чаңгыс классчыларынга өмек-дөмек болган кижи “Идегелдиг дузалакчы” болур. Хоорай олимпиадаларының тиилекчилеринге тускай ылгавыр демдектери база көрдүнген.
Чугула дыңнадыглар хүлээлгези чаттың бүгү-ле киржикчилерин дыңнадыгның дугайында медээлээр. Чижээлээрге, ол дээрге ада-ие хуралының азы чылдың түңнел хыналда ажылының дугайында дыңнадыг болуп болур.
«Чурагайлыг дериг-херекселдер башкыларга өөредилге чорудулгазын шын организастаарынга дузалаарындан аңгыда, шүүттүг, түвектиг ажыл-херектерден хосталыр арганы бээр. Чугула дыңнадыглар хүлээлгези эргежок чугула дыңнадыгларны хилис эрттирбес арганы болдурар, а ол ышкаш видео-харылзааларны чара номчуур, онлайн-хуралдың азы ада-ие хуралының бижимел сөзүглелиниң протоколун алыр арганы бээр. Оон аңгыда, өөреникчилерни бедик демдектер-биле эвес, а ол-ла дораан “Сферумга” үнүп келир шаңналдар-биле идиг берип болур” деп, Сферум VK сервистиң удуртукчузу Рубен Акопов чугаалап турар.
Артур ХЕРТЕК белеткээн.
“Шын” №3 2024 чылдың январь 17