Шрифт
А А А
Фон
Ц Ц Ц Ц Ц
Изображения
Озвучка выделенного текста
Настройки
Обычная версия
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы
(видео, карты и т.д.)
Вернуть настройки по умолчанию
Настройки Обычная версия
Шрифт
А А А
Фон
Ц Ц Ц Ц Ц
Изображения
Междубуквенный интервал
Одинарный Полуторный Двойной
Гарнитура
Без засечек С засечками
Встроенные элементы (видео, карты и т.д.)
Вернуть настройки по умолчанию

Чаңгыс аай чурум.

26 октября 2022
2

Муниципалдыг тургузугнуң девискээринге аар кем-херек үүлгеткен таварылгада профилактика албан черлериниң хөделиишкиннериниң чаңгыс аай чурумун тодарадып каан хоойлу-дүрүм актызын ажылдап кылыр даалганы республиканың Чазааның Даргазының оралакчызы Тимур Кууларга Тываның Баштыңы Владислав Ховалыг берген. Медээлерни дүрген солчурунуң чуруму Тыва Республика талазы-биле Иштики херектер яамызы-биле тодараттынган болур ужурлуг. Саналдап киирген чурумнуң күүселдезин кожууннар чагыргаларының даргалары шыңгыы контрольдаар хүлээлгелиг.

Аар кем-херек үүлгеттинген таварылгада чаңгыс аай хөделиишкинниң планын ажылдап кылыр болгаш боттандырар даалганы Тыва Республикага кем-херек болдурбас талазы-биле ведомстволар аразында комплекстиг планның күүселдезин сайгарып көрген түңнелдери-биле Владислав Ховалыг берген.

Назы четпээн уругларның кем-херек үүлгедиринге удур профилактика айтырыы ол сайгарылга үезинде чидии-биле көдүрүлген. Тыва Республика талазы-биле Иштики херектер яамызының медээлери ёзугаар алырга, назы четпээннер киришкен кем-херек үүлгедиглери республикада неделя санында бүрүткеттинип турар. Бо чылдың эрткен 9 айларында кем-херек үүлгедиглери ниитизи-биле эвээжеп-даа турар болза, назы четпээннер үүлгеткен кем-херектер 6,2 хууга азы 146 таварылгадан 155 таварылга чедир көвүдээн.

Аар кем-херек үүлгедиглериниң профилактиказының хөй санныг хоойлу-дүрүм актылары, социал деңнели ажы-төлге айыылдыг өг-бүлелер-биле ажылдың янзы-бүрү ажылчын бөлүктери болгаш комиссиялары бар-даа болза, байдал херек кырында экиживээн.

Кем-херек үүлгедиглери болгаш корүм-чурум үрээшкиннери-биле демиселге республиканың күүседикчи органнарының, хоойлу-дүрүм камгалалының органнарының, тус чер бот-башкарылга органнарының ажыл-чорудулгазын удуртуп-башкарар сорулга-биле хүлээп алдынган шупту хоойлу-дүрүм актыларының ревизиязын чорудар, ооң түңнелдери-биле тургустунуп келген байдалды сайгарар даалганы чазактың социал блогунга, регионнуң айыыл чогунуң департаментизинге болгаш тус чер чагыргаларынга Владислав Ховалыг берген.

Ш. МОҢГУШ белеткээн.