Ада-чурт камгалакчыларының хүнү февраль 23-те тыва спортчулар чонун, эш-өөрүн өөрткеннер. Баштай Чаян Ооржак One Friday Fights деп хевирге тиилээш, орукту эштеринге ажыткан. Улаштыр Начын Сат One Championships деп азия лигазынга азербайджан спортчу Турал Аскаровту 1 дугаар раундуга чедиишкинниг тиилээш база өөрүшкүнү бедик көдүрген.
Дараазында 3 дугаар FigtNigts Global деп Россияның кол лигазынга тыва чоннуң ынак спортчузу Түмер Ондар шыырак дээн аштырыг чок 2 тиилелгелиг казах спортчу Кораласов Богашарны эки белеткелиниң дузазы-биле база шииткекчилерниң чаңгыс аай шиитпири ёзугаар тулган тиилелгени Тывазынга эккелген.
Удуртукчулар ол кежээ чемпион ат база кур дээш туржур турган Чакаев Анзорнуң келбээнин барымдаалааш, казах спортчуну чалааш, киириштиргеннер. Спортчуларга база тренерлерге февраль 23 хүнүнде улуг тиилелгени чонунга сөңнээни дээш, өөрүп четтиргенин илеретпишаан, быжыг кадыкшылды, спортчу чедиишкиннерни күзедивис!
Алексей Чамбал-оол.
Чуруктарны интернеттен алган.
“Шын” №15 2024 чылдың февраль 28
