Декабрь 26-да Тываның Чазаанга байырлыг хурал болуп эрткен. Аңаа ТР-ниң Баштыңы Владислав Ховалыг болгаш ТР-ниң Дээди Хуралының Даргазы Каң-оол Даваа республиканың ат-сураглыг, хүндүткелдиг күрүне ажылдакчыларынга болгаш аңгы-аңгы адырларга сезен чылдар дургузунда шылгараңгай ажылдаан хамаатыларга ТАР-ның ССРЭ-ниң составынче киргенден бээр 80 чыл оюнга тураскааткан юбилейлиг медальдарны тывыскан.
«ТАР-ның ССРЭ-ге эки тура-биле каттышканындан бээр 80 чыл болган оюн демдегледивис. Сезен чылдың дургузунда Тываның сайзыралы дээш, бүгү сагыш-сеткилинден бердинип ажылдап чораан хамаатыларывыс бөгүн бо залда чыглып келди. Аңгы-аңгы адырларга ажылдап чорзуңарза-даа улуг-даа, бичии-даа төрээн чериңерге ынакшыл силерни каттыштырып, идепкейлиг хөй-ниитижилер кылып чораан.
Эргим, өңнүктер! Дүүн РФ-тиң Президентизи Владимир Путин-биле чугаалаштым. Чуртувустуң удуртукчузу силер бүгүдеге байырлал таварыштыр изиг байырын чедирди. Чаа чыл-биле!» – деп, ТР-ниң Баштыңы В. Ховалыг чугаалаан.
ТР-ниң Баштыңы Владислав Ховалыгның дужаалы-биле ТАР-ның эки туразы-биле ССРЭ-ниң составынче киргенден бээр 80 чыл болган оюнга тураскааткан юбилейлиг медальды «Орус географтыг ниитилел» Бүгү-российжи хөй-ниити организациязының Тывада салбырының даргазы Кара-кыс Аракчаага, ТР-ниң Баштыңының сүмелекчизи, күш-ажылдың хоочуну Александр Бегзиге, социал адырның хоочуну Ольга Дамдынга, көдээ ажыл-агыйның хоочуну Дадар-оол Доңгакка, күрүне ажылдакчызы Өргелээр Ондарга, өөредилге адырының тергиини Валентина Ондарга, күш-ажылдың хоочуну Кошкар-оол Ондарга, күрүне ажылдакчызы Хонук-оол Моңгушка, Тыва телевидениениң хоочуну Дыдый Сотпага, Россияның алдарлыг тренери Евгений Тутатчиковка, арга-арыг ажыл-агыйның хоочуну Сергей Сапелкинге, кадык камгалалының хоочуну Алевтина Сиразитдиновага, Тываның улустуң чогаалчызы Кара-Күске Чоодуга, күрүне ажылдакчызы Григорий Ширшинге, кадык камгалалының хоочуну Роза Ширшинага, Тываның эң-не баштайгы болгаш эң-не сөөлгү Президентизи Шериг-оол Ооржакка дээш ниитизи-биле 31 идепкейлиг хамаатыга шаңналды тывыскан.
Кылган ажылын үнелеп, шаңнал тывысканы дээш өөрүп четтиргенин хоочуннар илереткен.
Айдың ОНДАР.
Буян ООРЖАКТЫҢ тырттырган чуруу.
«Шын» №100 2024 чылдың декабрь 28
