Тускай шериг операциязында киржип турар чаңгыс чер чурттугларывыска материалдыг дуза кадар ажылдар ам-даа уламчылап турар. Чаа чылдың байырлалын уткуштур Тываның малчыннары болгаш эът-чем-биле сырый харылзаалыг ажылдап чоруур сайгарлыкчылар бо удаада эът чорудар деп шиитпирлээн:
Бүгү-российжи улусчу фронтунуң ТР-де салбырының удуртукчузу Саима Далчин:
– Чаа чыл байырлалының бетинде чеде бээр кылдыр декабрь 21-де тускай шериг операциязынче чүък чорударын планнап турар бис. Бо удаада ниитизи-биле 3 тонна эът болгаш суугу, чылыг идик-хепти чорудар бис. Келир айда, Шагаа бетинде, 5 тонна эът чорудары планда көрдүнген. Тускай шериг операциязында киржип турар чаңгыс чер чурттугларывыска материалдыг деткимчези дээш «Муңчу» малчыннарга, удуртукчуларга база өске-даа эш-хуузу-биле дуза кадып келген чонувуска четтирдивис.
Сукпакта «Заря» көдээ ажыл-агый бүдүрүлге кооперативиниң даргазы Чодураа Кенденниң чугаалааны-биле алырга, ук кооперативтиң мал согар цеги 2016 чылдан тура ажылдап эгелээн.
– Бо чылдың ноябрь айда агаар-бойдус сооп эгелээрге-ле, тускай шериг операциязында киржип турар чаңгыс чер чурттугларывыска эът чорудуп бээр дээш, Көдээ ажыл-агый яамызынга гуманитарлыг дуза кадар дугайында күзеливисти илереттивис. Бистиң кооператив мал согарындан аңгыда, сүттен ак чемнерни болбаазырадып турар. Эрткен чылын ТШО-да чаңгыс чер чурттугларывысче инек эъди болгаш саржагны чоруткан бис. А бо чылын 30 хой эъди чорудуп турарывыс бо – деп, Чодураа Кенден чугаалады.
Айдың ОНДАР.
Ада ТЮЛЮШТУҢ тырттырган чуруу.
«Шын» №97 2023 чылдың декабрь 20
